CEBU, Philippines - Gikondenar ug gisaway sa National Council of Churches in the Philippines (NCCP) nga gilangkoban sa lain laing kahugpungan sa mga relihiyusong grupo nga dili katoliko ang gihulagway nila nga pagbasura ug pagbugal-bugal ngadto sa ilang sektor ni Barili Bise Mayor Marlon Garcia.
Subay sa press statement nga giluwatan sa NCCP nga gipangulohan sa executive committee sa board sa kahugpungan nga si James Tioco pinetsahan niadtong petsa 26 sa Enero gipadayag niini ang ilang dakung kahiubos sa gihulagway nilang pagbugalbugal ni Garcia sa ilang sektor human gibabagan ang gahin alang sa pagpatukod og kaugalingong sam-ang sa mga non-Catholic Christian diha sa lungsod sa Barili.
Gipasabot ni Tioco nga ang ilang lokal nga mga simbahan nga nagbase sa maong lungsod maoy personal nga mihangyo ngadto ni Mayor Teresito Marinas sa milabay’ng tuig nga butangan sila og kaugalingong sementeryo gumikan kay dili man mahimong malubong sa publikong sementeryo sa mga katoliko ang ilang mga sakop nga mamatay.
Si Marinas sa iyang bahin mipadayag dihang nahinabi sa Banat News nga gisanong niya ang maong hangyu tungod kay nakita niya ang panginahanglan niini hinungdan nga migahin siya og P200,000 alang sa pagpalit sa luna nga sobra sa 3 mil hektaryas diha sa barangay Maghanoy nga gipanag-iya sa pamilyang Catipay ug iyang gisukip sa proposed budget karung tuiga.
Apan subay sa nahipos nga dokumento sa NCCP nagpakita nga gipapas ang P200 mil nga gahin ug gibutangan lang kini og P1 nga budget nga maoy gi-aprobahan sa konseho nga gipangulohan ni Garcia.
Giangkon ni Marinas nga gi-veto pa unta niya ang maong pagkanselar sa gahin niini ug ang pagbutang lang og P1 ug ang ubang item nga gipapas sa konseho og gisukipan ug laing budget appropriation apan matud pa niya na override ang iyang veto power.
Nunot niini, gihulagway sa NCCP nga insulto ug iresponsable ang gihimong aksiyon sa konseho pinangulohan sa presiding officer.
Ang grupo midangop karon sa buhatan sa Ombudsman for the Visayas. (BANAT NEWS)