Suspek sa kidnap-slay gidakop

CEBU, Philippines - Mga suspetsadong midagit ug gidudahang maoy mipatay sa 6-anyos nga bata positibong giila sa mga saksi kagahapon sa hapon diha sa buhatan sa Provincial Intelligence Branch (PIB) sa Cebu Provincial Police Office (CPPO).

Ang mga suspetsado (mga pangalan gipugngan sa Banat News) gi-hold kini sa Bureau of Immigration sa Mactan Cebu International Airport sa ilang pagsakay unta sa usa ka flight paingon ngadto sa Hong Kong niadtong Sabado sa gabii human ang ilang mga hulagway diha sa ilang mga passport mitukma sa cartographic sketch sa mga suspetsadong midagit ug mipatay kang Ellah Joy Pique niadtong Martes (Pebrero 8).

Ang 47-anyos nga Norwegian ug ang fiancée niining 25-anyos nga usa ka registered nurse nga taga lungsod sa Tuburan hugtanong mihimakak sa mga alegasyon batok kanila ug miingon nga nasaypan lang sila.

Matud pa sa babaye siya ug ang iyang pamanhunon parehong okupado sa ilang engagement ug dili mahitabong managit sila og bata.

Ang iyang pamanhunon naabot alas 6:40 sa gabii niadtong Pebrero 7, 2011 ug mi-check-in dayon sila sa usa ka hotel sa barangay Matumbo, dakbayan sa Lapu-Lapu ug mi-check-out sila mga alas 8:00 sa buntag pagkasunod adlaw.

Human niini milahos dayon sila ngadto sa usa ka mall sa uptown area aron makigkita sa iyang iyaan alang sa pagpalit og engagement ring nilang duha sa fiancée.

Human niadto daghan pa silang gilakaw sama sa pagkuha sa iyang Professional Regulatory Commission (PRC) ID nga iyang gigamit sa pagtuon sa sinultihang Norse (Norwegian) sa usa ka Norwegian Language School ug dayon nangaon sa usa ka kan-anan sa Lahug ug mi-check in sa dakong hotel sa Lahug alas 5:00 sa hapon.

Niadtong Miyerkules mga alas 11:00 sa buntag sila mi-checkout sa maong hotel ug miadto sa Ayala Business Park sa lain na usab nga katuyoan ug pagkahuman nangabang og masakyan paingon sa Tuburan.

Matud sa Filipina nga daghang makatestigo niini pabor kanila.

Ang langyaw usa ka system computer engineer sa Kongberg, Norway miingon nga wala silay sakyanan ug nangabang lang sila og sakyanan nga Toyota Vios nga kolor blue kinsa usa ka si Saldy Sala maoy nagmaneho nga ilang gisakyanan sa iyang pag-abot gikan sa airport.

Ang Norwegian kusganong mihimakak sa pasangil ug dili mahitabong managit siya og bata tungod kay dili siya makapatuyang og lihok-lihok tungod sa iyang inborn disease o sakit-sukad sa iyang pagkatawo nga “multiple hereditary exostoses” sa tibuok niyang lawas.

Apan usa ka bugaw sa Camagayan ang nangangkong regular niyang kostumer sa usa ka beer house diha sa dalan Pelaez sa barangay Camagayan, dakbayan sa Sugbo ang napatik sa cartographic sketch.

Ang nahisgutang bugaw pagkakita sa cartographic sketch diha sa mga pamantalaan miduol sa usa ka tigbalita sa RMN-DYHP ug mibutyag kini nga ang maong langyaw mimando ngadto kaniya nga padalhon siya og menor de edad ngadto sa usa sa mga resort sa lungsod sa Moalboal.

Tungod niini, gipahibawo usab dayon sa maong tigbalita ngadto sa kapolisan sa iyang nadawat nga kasayoran hinungdan nga ang usa ka team nga gipangulohan ni Sr. Supt. Erson Digal, hepe sa CPPO uban sa PIB, Criminal Investigation and Detection Group 7, Regional Intelligence Branch ug kapolisan sa Moalboal Police Station ug Minglanilla Police Station daling miadto sa Moalboal ug gisiksik ang tanang mga resort sa Bas Dako.

Usa ka cook sa usa sa mga resort sa maong dapit ang misumbong ngadto sa mga polis nga nakakita siya og usa ka langyaw nga daling mibiya dihang nagpadulong ang mga polis.

Si Renante Pique ang amahan ni Ellah Joy nagkanayon nga bisan sa kamatayon sa iyang anak gusto niyang mopatigbabaw ang kaangayan ug hustisya ug buot niyang ipaagi ang tanan sa proseso ang pagsilot sa mipatay sa ilang anak.

Gawas sa bugaw, ang kaluhang nagpanuigon og 10-anyos nga mga batang lalaki sa lungsod sa Minglanilla ug laing duha ka mga estudyante sa Calajoan Elementary School nga nakakita sa pagdagit kang Ellah Joy positibong miila sa duha.

Si Digal nagkanayon nga ang giandam nga P200 mil nga reward money ihatag ngadto sa moila ug motestigos batok sa mga suspetsado apan ipaubos sa saktong proseso ang paghatag sa maong ganti.

Kahinumduman nga si Ellah Joy gidagit niadtong Martes human sa pamuhi niini sa ilang eskwelahan ug napalgan kini niadtong Miyerkules sa bung-aw sa barangay Guibuangan, lungsod sa Barili nga patay na.

Duha ka mga nagpakabanang mga tawo ang miduol ngadto kang Renante ug mitug-an nga dunay laptop nga na-recover ang mga awtoridad ug gilauman nga ang sulod sa mga file sa nahisgutang laptop dunay makuhang mga ebidensiya kabahin sa hitabo.

Apan si Atty. Salvador Solima ang abogado sa mga suspetsado nagkanayon nga ilegal ang pagsikop ug pagdetiner sa iyang mga kliyente tungod kay gibase lamang sa cartographic sketch.

Ang mga suspetsado ipresentar karong adlawa (Lunes) sa Police Regional Office (PRO)-7 samtang gihikay na ang tukmang kaso nga ipasaka batok kanila. (BANAT NEWS)