Pamilya sa mga nalumos kadawat og tseke sa Kapitolyo

CEBU, Philippines - Gihatagan ni Gobernador Gwendolyn Garcia pinaagi sa Provincial Social Welfare and Development Office (PSWD) og pinansiyal nga hinabang ang mga pamilya sa tulo ka manag-agaw nga nalumos ngadto sa Abayan River sa barangay Gen. Climaco (kanhi barangay Malubog) siyudad sa Toledo kaniadtong Nobiyembre sa milabay’ng tuig.

Nasayran nga sila si Jonathan Egloria, 16-anyos, Jerick Egloria Camos, 15-anyos ug Ronnie Egloria Montomo, 13-anyos nagkalingaw og panapyaw og isda sa nahisgutang suba dihang nahitabo ang aksidente.

Giingon nga ang tulo ka manag-agaw natagak sa kimba sa maong suba ug nangalumos kini tungod kay ang tulo dili makamao nga molangoy. Ang mga inahan sa tulo ka mga biktima nga sila si Florencia Egloria, Camela Camus ug Evelyn Montomo emosyonal nga midawat sa P5 mil nga tseke nga hinabang gikan sa buhatan ni Garcia. 

Ang nahisgutang mga inahan mapasalamaton sa gihimong tabang sa gobernadora ngadto kanila. (BANAT NEWS)