Sobra sa 2,000 ka pamilya apektado sa pagpanglimpiyo

CEBU, Philippines - Mokabat ngadto sa 2,360 ka mga pamilya ang maapektohan sa pagpanglimpiyo sa kasapaan ug kabaybayonan diha sa dakbayan sa Mandaue.

 Ang maong mga pamilya naa diha nagpuyo sa daplin sa kasapaan ug kabaybayonan diin mahimutang sa kakuyaw ang ilang kahimtang sa higayon nga masinati ang pagdaut sa panahon nga naglakip sa bagyo o pagbunok sa kusog nga ulan.

Si Emmanuel Arong nga maoy pangulo sa buhatan sa Housing and Urban Development Office (HUDO) sa maong dakbayan mipadayag niini dihang nahinabi sa mga tigbalita sa press conference nga gihimo sa milabay’ng adlaw.

Ang mga barangay nga dunay daghang nagpuyo diha sa daplin sa kasapaan ug kabaybayonan mao ang barangay Subangdaku, Tipolo, Guizo, Mantuyong, Looc, Banilad, Cabancalan, Basak ug uban pa.

Ang nahisgutang mga lugar makasinati og pagbaha o pag-awas sa tubig sa higayon nga kusog ang pagbunok sa ulan.

Si Arong miingon nga ilang gihan-ay ang mga lakang nga pagahimoon sa kagamhanan ngadto sa maong mga molupyo pinaagi sa pagpasabot kanila aron sila mahikling ngadto sa luwas nga lugar.

Gitataw niya nga ilang itugyan ang kaakuhan sa legal office sa dakbayan kinsa maoy gitahasan sa mga lakang nga pagahimuon nga naglakip sa pagpahigayon og demolisyon sa mga ilegal nga estraktura.

Si Atty. Francisco Amit nga maoy city legal officer sa Mandaue sa iyang pamahayag mipasabot nga sa kasamtangan maoy ilang gihimo ang pagsubay sa balaod ubos sa Republic Act 7279 kon Urban Development and Housing Administration (UDHA) nga gipatuman sa kagamhanan.

Matud pa niya nga ilang gihimo ang konsultasyon ug ang paghatag og lugway nga 60 ka adlaw alang sa paghawan sa mga ilegal nga estraktura nga gitukod diha sa kasapaan.

Gitanyag nila ang paghatag og relocation site alang sa mahikling nga molupyo ug ang paggahin usab og salapi sa kagamhanan sa maong dakbayan isip pinansiyal nga hinabang ngadto sa naapektohan. (BANAT NEWS)