Batang manglungkabay og taxi nakaikyas sa tanod

CEBU, Philippines - Usa ka 9-anyos nga batang lalaki kinsa giingong notadong manglungkabay og mga taxi ang nasikop sa gipahigayong follow-up operation sa mga tanod sa barangay Labangon, dakbayan sa Sugbo niadtong milabay’ng gabii.

Si Randy Ypil, 30, taga barangay Canjulao, dakbayan sa Lapu-Lapu, drayber sa taxi ang mireport ngadto sa mga tanod sa barangay hall sa nahisgutang barangay nga ang iyang unit gilungkab kini sa batang lalaki ug gidala ang iyang kita sa tibuok adlaw.

Matud ni Ypil nga giparada niya ang iyang gimanehong taxi mga alas 7:30 diha duol sa eskina Katipunan ug dalan A. Lopez aron mopalit og ticket sa lotto.

Apan sa iyang pagbalik ngadto sa iyang unit nakugang na lang siya tungod kay ang walang bahin sa dashboard nga pultahan niini naabli na.

Dali niyang gisusi ang iyang kwartang P1,000 nga kinitaan sa tibuok adlaw nga gibilin niya diha sulod sa sakyanan apan nahanaw na kini.

Tulo ka tanod nga gipangulohan ni Boy Alega ang mipahigayon og follow-up operation human si Ypil mi-report kabahin sa insidente.

Sa gipahigayong pakisusi sa mga tanod ngadto sa lugar nga nahitaboan usa ka tindera ang mitug-an nga nakita niya ang duha ka batang lalaki nga milungkab sa unit ni Ypil.

Usa sa mga giingong suspetsado nga nakita sa tindera ang notadong bata nga manglungkabay og taxi diha sa ilang lugar kinsa giingong gidungog nang manglungkabay og taxi sukad pa niadtong tuig 2009.

Ang tanod nga si Renato Vecena nakaila sa maong bata hinungdan nga dali nila kining giadto sa balay.

Ang nahisgutang bata gidala sa mga tanod diha sa barangay hall ug P100 na lang ang na-recover nga kwarta gikan sa bata nga gisulod diha sa bulsa niini sa P1,000 nga kinitaan ni Ypil.

Ang bata gipapundo diha sa barangay hall hangtud nianang pagkabuntag sa milabay’ng adlaw ug gikaligo ug gipakaon kini sa mga tanod.

Apan ang maong bata misibat dihang ang mga tanod nalipat tungod kay dunay laing gialarmahan nga insidente.

Si Vecena mibutyag nga ang maong insidente dili maoy unang hitabo ug ikaduhang higayon na karon nga nasikop ang nahisgutang bata diin una kining nasikop niadtong tuig 2009.

Si Vecena midugang nga sukad niadtong tuig 2009 mokabat na ngadto sa 40 ka taxi ang giingong nalungkab sa bata diha sa barangay Pahina Central ug Labangon.

Base usab sa ilang nahipos nga report ang maong bata giingong nagsugod og pagpanglungkab dihang nagpanuigon pa lang kini og lima ka tuig.

Ang nahisgutang bata giingong duna kini laing duha ka mga kuyog.

Si Alega nagkanayon nga wala silay mahimo sa pagdisiplina sa maong bata ug bisan pa nga ilaha kining dalhon ngadto sa Department of Social Welfare and Development (DSWD) mosibat gihapon kini sama sa gibuhat niini kaniadto. (Uban sa report nila ni Ryan Christopher J. Sorote sa The Freeman)  (BANAT NEWS)