Nanghinol sa dalagita gibilanggo

CEBU, Philippines - Mikagulkol sa prisohan ang usa ka tawo nga nasakpang nanghinol sa pribadong bahin sa lawas sa usa ka dalagita didto sa Purok Limonsito, barangay Umapad, dakbayan sa Mandaue sa miaging gabii.

Si PO3 Gregorio Cabizares sa kapolisan sa Presinto 5 sa Mandaue City Police Office (MCPO) miila sa suspetsado nga mao si Reymond de Guzman, 27, ulitawo nga nagpuyo sa maong dapit.

Matud pa ni PO3 Cabizares nga gikan sa usa ka tindahan ang 14 anyos nga tinun-ang babaye nga may gipalit sa usa ka tindahan sa maong lugar sa alas 7 pasado ang takna sa gabii.

Dihang ang suspetsado kinsa nakainom og ilimnong makahubog iyang nasugatan kalit lang misigpo ug mikuot sa bilahan sa biktima busa mikisikisi   sa kakurat ug giwakli sa biktima ang kamot sa suspetsado.

Apan imbis mokalma, matud pa sa kapolisan nga misamot kaabtik ang kamot sa suspetsado sa pagkuot sa bilahan sa biktima hinungdan nga mikaratel kini og dagan paingon sa ilang balay.

Didto misugilon kini sa iyang ginikanan nga naghilak gumikan sa gibuhat sa suspetsado kaniya.

Gumikan sa kalagot, ang amahan sa biktima maoy misumbong sa kapolisan ug sila si PO1 Rey Patigdas ug PO1 Alvin Palonpon maoy misikop dayon sa suspetsado ug mibalhog niini sa bilanggoan. Kasong child abuse ang gipasakang kaso batok sa suspetsado. (BANAT NEWS)