CEBU, Philippines - Usa ka gikatahapang pusher og shabu nadakpan sa buy bust operation sa kapolisan didto sa sitio Maharlika sa barangay Tipolo, dakbayan sa Mandaue, kagahapon pasado ala 1:00 ang takna sa hapon.
Ang nadakpan mao si Bryan Antona, 28 , ulitawo, nga lumad nga taga Bukidnon ug kasamtangang nagpuyo sa nahisgotang dapit.
Si SPO2 Danilo Barrita sa kapolisan sa Presinto 5 sa Opao Police Station nga nahinabi sa Banat News miingon nga ang buy bust nga gipangulohan ni Inspector Wilson Abot gipahigayon alang unta sa usa ka ginganlan og Taton sa maong dapit.
Matud pa ni SPO2 Barrita nga sa ilang buy bust nga gihimo migamit sila og police decoy nga maoy misuway og palit og shabu ni Taton. Apan gibalibaran kini sa suspek kay matud pa nahutdan siya og stock.
Busa nakahukom ang grupo sa pagbiya sa maong lugar dihang nasugatan nila si Antona nga kuyog sa laing lalaki nga kadudahan og mga lihok
Dihang giduol ni PO2 Bros Taneo aron rikisahon, mikaratel kini og panagan busa gigukod dayon kini sa mga polis ug nadakpan si Antona.
Unya nasakpan nilang gisalibay niini ang usa ka putos nga gituohan nilang shabu apan gipunit sa kapolisan. (BANAT NEWS)