Ginikanan giawhag, anak bantayan

CEBU, Philippines - Human sa nahitabong pagdagit ug pagpatay sa 6-anyos nga bata sa lungsod sa Minglanilla ang hepe sa kapolisan sa dakbayan sa Talisay miawhag sa mga ginikanan nga bantayan ang ilang mga anak aron dili na mahitabo ang susamang insidente.

 Si Superintendent Henry Biñas, hepe sa Talisay City Police Station sa pakighinabi sa Banat News kagahapon nagkanayon nga giawhag niya ang mga ginikanan nga angay nga dili basta-basta pagawason sa ilang mga balay ang mga bata ilabi na kung dili kini makita sa ilang panan-aw.

Matud usab sa hepe nga ang mga bata kinahanglang adunay mohatud ug mokuha niini sa eskuwelahan.

Gawas niini kinahanglang pahimangnoan sa mga ginikanan ang ilang mga anak nga dili magpataka og kuyog sa tawong wala sila ka suhito.

Ang hepe nagkanayon usab nga manghinaot siya nga ang mga tunghaan butangan og mga tanod aron makatabang kini og bantay sa mga bata panahon sa klase ug inig pamuhi sa klase.

Si Biñas midugang nga ang mga tunghaan karon sa Talisay iyang gidestinohan og mga polis nga magpatrolya ilabi na sa panahon sa pamuhi.

Sa nahitabo ni Ellah Joy Pique daghang mga ginikanan nga gibati og kabalaka nga nakapaisog kanila sa pagbantay sa ilang mga anak.

Sa pagkakaron ang mga kabataang nagtungha guwardiyado na sa ilang mga inahan o amahan. (BANAT NEWS)