Gitusak og bala gikan nangompra

CEBU, Philippines - Natusak sa bala ang lawas sa usa ka mag-uuma human kini gi-atangan sa iyang kaatraso sa mingaw ug ngitngit nga lugar samtang paingon na untang mopauli gikan nangompra sa bukirang bahin sa barangay Cansumoroy lungsod sa Balamban niadtong Biyernes sa alas 7:30 sa gabii.

Ang biktima nga patay diha-diha mao si Arsenio Lapuerta, 42, molupyo sa sitio Buli barangay Cansumoroy sa maong lungsod, samtang padayon pa pag-ila ang kapolisan sa mamumuno niini.

Matud ni PO3 Julius Obanana sa Balamban Police Station dihang nahinabi sa Banat News ang mga anak sa biktima mibutyag nga gikan ang naulahi sa lungsod kay nangompra alang sa ilang konsumo.

Apan dihang pipila nalang kini ka metros gikan sa pinuy-anan niini kalit lang nilang nabati ang upat ka sunod-sunod nga buto sa armas ug dihang ilang gisusi patay na ang ilang amahan.

Naabtan nalang ang biktima nga nagbuy-od na sa dalan sa dulhogon nga bahin ug ngitngit nga lugar paingon sa ilang pinuy-anan nga naglunang na sa kaugalingong dugo human makaangkon og samad pinusilan sa abaga, tiyan ug dughan. Sa pasiunang pakisusi sa kapulisan nga sa milabay’ng mga bulan dunay gikaaway ang biktima nga molupyo sa sikbit nilang barangay apan gituohan nila kini nga nahilot na.

Way na-recover nga kabhang ug basiyo sa bala sa crime scene gumikan kay gihulagway ni Obanana nga bukid kaayo ang lugar ug kalibunan pa kaayo.

Personal nga kasungian ang sentro sa gitutukan nga motibo sa krimen nga gisubay karun sa nagpadayong imbistigasiyon sa kapulisan sanglit wala may dautang record ang biktima nga natala sa buhatan sa kapulisan. (BANAT NEWS)