13 container smuggled rice isubasta sa BOC

CEBU, Philippines - Ipasubasta na ni Cebu Customs District Collector Atty. Ronnie Silvestre ang 33 ka mga container vans nga adunay sulod nga sinakong bugas nga gipayuhot dinhi sa Sugbu sa milabay’ng tuig.

Matud pa ni Silvestre mihatag na og floor price ang buhatan sa National Food Authority (NFA) balor P13 milyones ang maong sinakong bugas nga nakumpiskar ang buhatan sa Legal Division uban ni Atty. James Dy Buco.

Karong umaabot petsa 14 ning bulana himuon ang pagsubasta diha sa buhatan sa Bureau of Customs sa Port of Cebu ug ang kitaon sa maong subasta adto na kini masulod sa panudlanan sa POC ug mahimo na kining ikadugang sa target collection sa maong buhatan sa bulan sa Pebrero ning tuiga.

Kahinumduman nga 33 ka mga 40 footer vans nga puno sa pinayuhot nga bugas ang giablihan sa BOC nga gisaksihan ni ESS Director Joey Yochongco isip maoy representante ni BOC Commissioner Angelito Alvarez niadtong Disyembre 9, 2010 sa Cebu International Port.

Ang 33 ka mga container van sa bugas gikan sa nasud sa Vietnam diin luwan kini sa M/V Kota Hining V nga lain ang deklarasyon niini ug mikabat sa P18 milyones. (BANAT NEWS)