Mga tanod gilabaya'g granada

CEBU, Philippines - Usa ka lalaking milabay og granada sa mga barangay tanod sa Labangon ning dakbayan nadakpan pasado alas-7 sa buntag kagahapon sa Salvador Extension sa barangay Labangon ning dakbayan. Ang nasikop mao si Allen Belderol, 26, molupyo sa maong lugar kinsa nakuhaan og usa ka granada.

Sa pakighinabi sa Banat News ni SPO1 Rene Labiaga, mibutyag nga nakadawat og reklamo ang mga barangay tanod kabahin sa suspek nga naghupot og granada ang suspetsado.

Ang mga tanod daling misusi sa maong lugar sa diha nga ila na unta kini nga duolon ang suspetsado giingong gilabayan sila og granada niini apan wala mobuto. Tungod niini nangayo og tabang ang mga tanod sa kapolisan hinungdan sa pag-abot sa mga sakop sa Special Weapons And Tactics nga miresulta sa iyang pagkasikop.

Matud pa ni Labiaga nga ang ilang imbestigador nagsubay pa sa background sa suspetsado tungod usab sa mga patik niini sa iyang kalawasan. Samtang gitun-an pa usab sa kapolisan sa Punta Princesa Police ang posibleng ipasaka nga kaso batok kaniya. (BANAT NEWS)