Nagtuong kidnaper, dalagita misutoy

CEBU, Philippines - Nunot sa nahitabong pagdagit ug pagpatay sa usa ka 6-anyos nga tinun-an sa lungsod sa Minglanilla, misaka ang pagkaalisto sa mga residente sa maong dapit.

Kini human usa ka 14-anyos nga dalagita ang miulpot sa kahadlok human kini hunongi og puwa nga kotse ug ang drayber niini mihagad kaniya nga pasakyon kay ihatud kung asa siya paingon kagahapon sa buntag diha sa sitio Bacay, barangay Tulay, lungsod sa Minglanilla.

Ang dalagita (pangalan gipugngan sa Banat News) nga taga barangay Poblacion Ward II sa nahisgutang lungsod misutoy og lakaw pahilayo sa awtong mihunong kaniya.

Si PO3 Alfredo Pugaling sa Minglanilla Police Station sa pakighinabi sa Banat News kagahapon nagkanayon nga ang inahan sa dalagita daling mitaho sa maong insidente ngadto sa ilang barangay hall sa Poblacion Ward II ug ang opisyal na sa barangay mao nay mi-report ngadto sa mga polis sa maong hitabo.

Si Pugaling nagkanayon nga nagkuyog niadtong tungura ang dalagita ug ang iyang inahan paingon nga mosimba apan ang dalagita gipahuwat sa inahan niini diha sa daplin sa karsada sa sitio Bacay tungod kay mihapit pa kini sa gitrabahoan sa iyang amahan.

Pagbiya sa inahan usa ka puwang kotse kalit lang mihunong ug ang drayber niini gihulagway nga tambokon ang panglawas nangutana sa dalagita kung asa kini paingon.

Giingong gihagad pa gyud sa maong drayber ang dalagita nga pasakyon kay ihatud niya kini sa padulngan niini maong mikaratil og dagan ang dalagita.

Ang drayber giingong sa walay igong hinungdan mipasutoy usab sa iyang awto palayo ug migawas sa national highway ug wala na igkita.

Ang maong reaksiyon dili kalikayan tungod sa nahitabo niining bag-ohay lang sa 6-anyos nga batang babaye nga si Ellah Joy Pique kinsa gidagit ug gipatay ug hangtud sa oras sa pagsuwat niining balita ang kapolisan padayon pang nangita sa mga kriminal sa bata. Ang mga ginikanan ug kabataan dili lang sa lungsod sa Minglanilla naalarma na sa maong hitabo.

Samtang sa pakighinabi sa Banat News ni Chief Inspector Laurel Almirante kini miingon nga posibleng ‘na-misinterpret’ lang sa maong dalagita ang maong drayber.

Gipasabot usab ni Almirante nga dili kalikayan ang mga susamang reaksyon ug nagtuong daghan gyung masaypan ang intension sa mga motorista.

Sa laing bahin, nagpadayon pa ang imbestigasyon sa pagdagit ug pagpatay kang Pique. (Uban sa report ni Lesley Caminade) (BANAT NEWS)