15 mil miduyog sa Anti-RH Bill prayer march

CEBU, Philippines - Dul-an sa 15,000 ka mga anti-RH Bill advocates ang mihugop ngadto sa Fuente Osmeña alang sa gipahigayong “Prayer March for Life” isip pagpakita sa dako nilang pagsupak sa gipapasar sa kontrobersiyal nga Reproductive Health Bill.

Si Dr. Rene Josef Bullecer, pangulo sa Human Life International, sa pakighinabi sa Banat News nagkanayon nga sa kinatibuk-an nahimong malampuson ang maong prayer rally nga mao usab ang magsilbing sinugdanan sa mas halapad pa nga nationwide mass rally sa ubang dapit sa Luzon ug Mindanao.

“It was successful because it is well represented by different organizations that are anti-RH Bill. Nakita gyud namo nga daghan gyud ang mosuporta sa atong pagsupak sa RH-Bill,” matud pang Bullecer.

Nagmaya si Bullecer tungod kay 80% sa mga misalmot kagahapon mga kabatan-onan nga maoy numero unong target sa RH Bill.

Lakip usab sa mga misalmot og mihatag suporta sa mga anti-RH bill advocates mao sila si Deputy Speaker Pablo Garcia, Cebu North District Kongresista Cutie del Mar, amahan niini nga si kanhi kongresista Raul Del Mar ug Cebu City Mayor Michael Rama.

Mibahad usab si Bullecer nga una palang kini sa naglinya nila nga mga kalihukan sa ilang pagpadangat sa daku nilang pagsupak sa gihikay nga balaodnon didto sa Kongreso.

Ang kapolisan sa Fuente Osmeña nga maoy nagbantay sa rotunda dihang gikahinabi sa Banat News miingon nga 5 mil kapin ug kuwang ang mitambong kagahapon. (BANAT NEWS)