Pusher mipasangil nga giplanteran

CEBU, Philippines - Usa ka gidudahang drug pusher nga nasikop sa kapolisan mipasangil nga giplanteran siya og shabu sa kapolisan sa dakbayan nga misikop kaniya sa Sitio Li-ong Brgy. Alang-Alang dakbayan sa Mandaue sa milabay’ng gabii.

Ang nasikop mao si Sesenio "Jonjie" Bellocora, hingkod, nga taga Visitacion St., dakbayan sa Sugbo.

Sa imbestigasyon ni P/Insp. Henrich Bangcolita sa CAIDSOTF nasuta nga si Bellocora dugay na nilang gipanid-an nga nagpayuhot og illegal nga drugas sa maong dapit hinungdan nga ilang gipahigayon ang buy bust operation mga alas 8:15 sa milabay’ng gabii.

Si Bellocora nasakmitan og upat ka gagmay’ng pakete sa gituhoang shabu. Ang suspetsado hugot nga nanghimakak sa maong pasangil sa katarungan nga giplanteran siya og shabu sa kapolisang midakop kaniya.

Kay matud pa niya naglagot ang mga polis nga wala siya mohatag sa gipangayo niining P100,000 kaniya.

Apan si Insp. Bangcolita mipasabot nga ang mga ebidensiya anaa na karon sa ilang buhatan aron kasilotan sa hukmanan ang suspetsado.

Si Bellocora gibalhug sa kapolisan sa Station 1 sa MCPO samtang giandam na ang kasong kalapasan sa Akta Republika 9165 ubos sa Sec. 5 Art. II gumikan sa pagpamaligya og ginadiling drugas. (BANAT NEWS)