Sugalang de makina sakmit

CEBU, Philippines - Duha ka makinang pasugalan ang nasakmit sa kapolisan sa dakbayan sa Talisay nga mironda didto   sa barangay Biasong, sa maong dakbayan kagahapon sa buntag.

Usa ka video karera ug usa ka mole-mole ang naimbargo sa grupo ni Inspector Hugo Rio Ipong. Ang nahisgutang pagpangronda nahimo human mosumbong ang ubang molupyo ngadto sa kapolisan bahin sa gipadagang sugalan nga de makina sa ilang lugar.

Ang mga nagbantay sa maong mga makina giila lang sa mga polis sa ngalang “Pedro” ug “Temmy” kinsa wala hidakpi sa mga otoridad atol sa pagronda nga ilang gihimo.

Gikataho nga ang mga namusta mialibwag og panagan dihang nabantayan ang nagsingabot nga mga polis.

Kahinumdoman nga gihigpitan sa kagamhanan sa siyudad uban sa kapolisan ang operasyon batok sa mga video karera ug mole-mole human madawat ang reklamo sa mga ginikanan. (BANAT NEWS)