Retiradong polis nga problema sa benepisyo nagpusil sa ulo

CEBU, Philippines - Kritikal ang kahimtang sulod sa pribadong tambalanan ang usa ka retiradong polis human giingong nagpusil sa iyang kaugalingon tungod kay nagproblema sa iyang retirement benefits.

Si retired SPO4 Joselito Villarin Palang, 56, biyudo ug nagpuyo sa maong dapit anaa karun sa Chung Hua Hospital human giingong miungot ang bala sa iyang ulo.

Si Palang gituohang nagpusil sa iyang tuong tampihak gamit ang .38 revolver sa sulod sa tindahan nga gipanag-iya sa iyang igsuong lalaki diha sa Lower Sikatuna St., sa barangay Day-as siyudad sa Sugbu.   

Sa gihimong follow-up sa Banat News kagahapon sa alas-2 sa hapon si SPO1 Jay Yballe sa Homicide Section sa Cebu City Police Office (CCPO) miingon nga si PO2 Cristobal Geronimo miadto sa Chung Hua aron pagkuha sa latest medical bulletin ni Palang ug giingong padayon pa kining gitabang.

Sa gihimong imbestigasyon nila ni PO3 Victor Ruel Ayuman, PO3 Geoffrey Gutual, PO3 Julius Mabunay ug Geronimo sa Homicide Section nagbutyag nga alas 9:45 kagahapon sa buntag nakadungog og usa ka masipang buto ang mga silingan sulod sa tindahan ni Rogelio Palang, manghod sa maong pulis,

Matud ni Geronimo nga usa ka 6-anyos nga batang lalaki ug apo ni Palang mitug-an kanila nga nagduwa-duwa siya niadtong higayona duol sa tindahan dihang milanog ang usa ka masipang buto sa armas. Sa iyang paglingi nakita niya iyang apohan nga dunay pinusilan sa ulo. Si Palang gidala ngadto sa Chung Hua Hospital sa iyang mga anak.

Si Palang miretiro sa serbisyo sa PNP niadtong Oktobre ug diha madestino kaniadto sa Waterfront Police Station sa CCPO.

Matud ni Geronimo nga sa wala pa mahitabo nga nagpusil ang naulahi nabantayan kini sa anak babaye nga misuway unta kini paghikog gamit ang nylon diha sa taas sa ilang balay. Gisuwayan unta nila kini pag-alam-alam apan nalipat lang sila og makadiyot nabati nalang nila ang sipang buto sa armas.

Matud pa si Palang nagpunay’g lakaw sa iyang retirement benefits niining bag-ohay lang tungod kay hangtud karun wala pa gyud makadawat niini ug posibleng mao kini gikagul-an og maayo.

Apan ang kapulisan mohimo pa og lawom nga imbestigasyon gawas sa paghikog. Dugang nahibaw-an sa kapulisan nga na mild-stroke si Palang niadtong Disyembre sa miaging tuig.

Sutaon usab sa kapulisan kung ang armas nga gigamit ni Palang sa pagpusil sa iyang ulo kun iyaha ba kining personal nga armas.

Gibiyaan ni Palang ang upat niya ka mga anak diin tulo ka lalaki ug usa ka babaye nga nagtrabaho sa usa ka call center dinhi sa dakbayan.

Si Supt. Pablo Labra II, Deputy City Director For Operation sa CCPO nga nahinabi sa mga tigbalita nagkanayon nga nakalitan siya sa nahitabo kang Palang ug naalarma na sila sa nagsunod-sunod nga paghikog sa mga polis.

Matud ni Labra nga mahimo man unta kining moduol kanilang mga opisyal sa CCPO aron mangayo’g tambag bahin sa iyang problema kay posibleng duna pa silay matabang niini.

Dako ang pagtuo ni Labra nga duna gyuy bug-at nga problemang giatubang si Palang hinungdan nga nagmagul-anon kini ug nakahuna-huna kining pagpusil sa iyang kaugalingon.

Kini maoy ikaduhang higayon nga dunay pulis nga nagpusil sa kaugalingon karun lang tuiga ug sa kinatibuk-an miabot nag 24 ka tawo ang naghikog sa dakbayan ug probinsya sa Sugbu sulod niining tuiga.

Matud ni Labra nga duna silay ‘Counsel of Elders’ diha sa CCPO nga maoy motabang sa mga kaubang may problemang giatubang. Nagplano usab karon si Labra nga mopahigayon og kalihukang makatabang sa problemadong kaubanan.

“In my own mag-organized og activity that we can interact with our men below, among ipaabot nila ang among tinguha pagtabang   nila sa ilang mga problema,” matud pang Labra. - BANAT NEWS