Siyam nangalanag tungod sa butete

CEBU, Philippines - Siyam ka mga tawo ang nalanag apil na ang upat ka mga bata nga nagpangidarun og duha ngadto sa siyete anyos human makakaon sa giluto nga isdang butete nga maoy ilang gisud-an sa panihapon kagahapon sa alas 3:15 sa kaadlawon sa barangay Basdiot lungsod sa Moalboal.

 Ang nangalanag mao sila si Petra Tapales, 73 anyos, minyo ug molopyo sa barangay Basdiot, Josefina Dopio, 34, ug bana niining si Leonardo Dopio, 45, ug mga anak nga sila si Leo Dopio, 6, Jennilyn Dopio, 3, ug Jeoffrey Dopio, 2.

Lakip sa nalanag mao sila si Nolan Cabaron, 34, ug asawa niini nga si Maryjean Cabaron, 34, ug anak nga si Jennilyn 7 anyos.

Matud ni PO2 Benedicto Rubia sa Moalboal Police Station dihang nahinabi sa Banat News subay sa imbestigasyon ang tanod nga si Liklik Avenido maoy mipahibawo sa kapulisan sa usa ka pamilyahan nga nalanag sa gikaong butete.

Gikatahong nakakuha og butete nianang pagkaadlawan si Josefina ug pagkahuman ilang giluto ug maoy ilang gitabangan og kaon sa ilang panihapon.

Apan nianang pagka-kaadlawon mao nalay ilang namatikdan nga pulos sila may gipamating pagsakit sa tiyan ug pagsuka-suka dungan ang pagpanglipong hinungdan nga dali silang nangayo og tabang aron madala sa tambalanan.

Dali hinuong miresponde ang kapulisan pinangulohan ni PO2 Rommel Gako ug gihatud sa Badian District Hospital sa lungsod sa Badian.

 Apan gibutyag ni Diez Gregoria, nurse on duty sa maong tambalanan dihang nahinabi sa Banat News nga luwas na sa peligro ang mga biktima ug lima lang niini ang gi-admit tungod sa pagsuka suka ug pagpanglipong.

Samtang ang mga bata gipaubos lang sa obserbasyon gawas sa lima nga maoy gi-dextrose.

Matud ni Gregoria gitug-an niini nga hilaw-hilaw ang ilang pagkaluto sa butete nga ilang gisud-an.

Ang butete dugay nang gipahibalo sa Bureau of Fisheries and Aquatic Resources nga dili luwas kan-on tungod sa neurotoxin sa unod sa maong isda nga makahilo. - BANAT NEWS