CEBU, Philippines - Patay nang napalgan ang usa ka batang babaye kagahapon sa buntag diha sa sitio Palalong sa barangay Guibuangan lungsod sa Barili kinsa mao ang batang gi-kidnap niadtong Martes sa hapon dili layo sa ilang tunghaan sa Calajoan Elementary School sa barangay Calajoan sa lungsod sa Minglanilla.
Ang biktima mao si Ellah Joy Pique, 6, usa ka tinun-an sa grade 1 sa Calajoan Elementary School kansang patay’ng lawas wala nay sapot ug giputos og bedsheet nga gibugkosan og wire nga gitambog sa riprap daplin sa dalan diha sa barangay Guibuangan.
Sa pakighinabi sa Banat News ni PO2 Hazel Caballero sa Minglanilla Police Station adunay testigong bata nga nakakita sa pagdagit sa biktima. Gikatahong usa ka langyaw ug usa ka Filipina ang midagit kang Pique.
Sumala pa ni Caballero gihaylo sa maong babaye ang biktima ug gipasakay sa sakyanan nga usa ka itom nga sports utility vehicle (SUV) niini tungod kay kaila nila ang ginikanan sa biktima.
“Gilabay ang bag sa lingkuranan (sa sakyanan) unya gisabak ug gigakos adtong babaye si Ellah Joy,” matud pa sa kauban sa biktima diha sa report sa ABS-CBN Central Visayas.
Ang mga ginikanan pagkahibalong wala na makauli ang anak midangop sa kapolisan sa Minglanilla kini aron ipa-blotter nga nawala ang ilang bugtong anak nga babaye ug kinamanghuran sa tulo nila ka anak.
Kagahapong adlawa, napalgan ni Minolos barangay Councilor Junrey Bayno ang patay’ng lawas sa usa ka bata pasado alas-7 sa buntag sa barangay Guibuangan daplin sa pangpang.
Ang kapolisan misusi sa maong lugar uban sa Scene of the Crime Operatives (SOCO). Ang bata giputos og bed sheet nga gipaubanan og dagkong mga bato.
Si SPO2 Zaldy Orello, desk officer sa Barili Police dihang nahinabi sa Banat News miingon nga posibleng plano sa mga kriminal nga itambog sa dagat ang patay’ng lawas
Matud pa ni PO3 Job Sarvida nga sa ilang pakisusi ngadto sa crime scene nagdudang posibleng gilugos ang bata apan ilaha pang paabuton ang awtopsiya sa patay’ng lawas niini.
Ang amahan sa biktima nga si Reynante Pique positibong miila sa patay’ng lawas pagkakita palang niini. Butyag usab ni Sarvida nga duha ngadto sa tulo ka metros gikan sa dapit diin makaplagi ang patay’ng lawas nakit-an ang bag sa biktima nga may tatak nga “GWEN” nga adunay sulod nga duha ka P50 uban sa mga notebook niini ug iyang uniporme ingon man iyang underwear apan nasakop na kini sa barangay Patupat.
Nahibulong si Reynante nganong adunay duha ka P50 sa bag sa anak nga wala man niya kini hatagi og bawon nga kwarta. Nagduda ang kapolisan nga posibleng mao kini gibayad sa mga kriminal sa ilang gihimo sa biktima.
Nagduda usab si Caballero nga daw gibaligya sa maong Filipina ang bata ngadto sa gituohang foreigner nga gidudahang usa ka pedophile nga kuyog niini.
Samtang nakita usab ni Caballero nga adunay hiwa sa alimpulo sa biktima nga gituohang nasamad kini atol sa paglabay sa lawas niini diha sa ubos.
Ang kapolisan sa lungsod sa Barili ug lungsod sa Minglanilla mipahigayon na og halawom nga imbestigasyon kalabot sa maong panghitabo samtang ila pa usab nga gipaabot ang resulta sa eksaminasyon nga gihimo sa SOCO kun gipahimuslan ba ang maong bata. -Lesley Caminade uban sa report nila ni Darrel Carumba ug Jayson Comanda (BANAT NEWS)