Papa tipi sa anak

CEBU, Philippines - Naputos og samad dinunggaban sa kalawasan ug ubang bahin sa ulo ang usa ka 56-anyos nga panday nga bag-ohay pang nakagawas gikan sa tulo ka adlaw nga pagkabilanggo dihang kini giunay og dunggab sa iyang kaugalingong anak samtang nagpahuway sa balay sa ilang silingan sa barangay Bagakay sa lungsod sa Sibonga niadtong Lunes sa ala 1:00 sa hapon.

Ang biktima mao si Dionisio Medrano, 56, samtang ang suspek mao ra ang kaugalingon niining anak nga si Alberto Medrano, 30, nga nagpuyo gihapon sa maong lugar.

Matud ni PO3 Ederlino Bacusmo sa Sibonga Police Station dihang nahinabi sa Banat News subay sa imbestigasyon nga ang biktima nagpahuway niadtong tungura dihang miabot ang suspek ug mitumaw ang ilang lalis.

Tunga-tunga sa ilang init nga panaglalis giduslak sa suspek og icepick makadaghang higayun ang biktima diha sa kalawasan ug sa ulo. Ang biktima gidala sa Vicente Sotto Memorial Medical Center.

Matud pa ni Bacusmo nagdumot sa amahan ang anak human niadtong Biyernes gihapsan sa biktima ang anak og kahoy sa agtang maong napriso og tulo ka adlaw ang suspek. (BANATNEWS)