IDMB gidepensahan ni Sr. Supt. Buenafe

CEBU, Philippines - Gikunsiderar sa kapulisan sa dakbayan nga dili ‘ordinaryong kriminal’ ang sinagop ni Mayor Socrates Fernandez sa dakbayan sa Talisay nga si Joavan Fernandez, matud pang Sr. Supt. Melvin Ramon Buenafe hepe sa Cebu City Police Office (CCPO).

Si Buenafe miingon nga daw wala na sa maayong panghuna-huna si Joavan sanglit kaduha na ka higayon nga gibanggaan niini ang sakyanan sa gobiyerno.

Kahinumduman niadtong miaging tuig gibanggaan ni Joavan ang Innova Patrol Car sa kapulisan sa Talisay human kini gialarma sa kapulisan dinhi sa dakbayan sa Sugbu ug niadtong Domingo sa kaadlawon gibanggaan sab ni Joavan ang sakyanan nilang Chief Insp. George Ylanan, hepe sa Investigation and Detective Management Branch (IDMB) sa CCPO nga buot untang modakop kaniya diha sa Sindulan, Mabolo pinasikad sa warrant of arrest sa kasong Malicious Mischief.

Matud ni Buenafe nga klaro ug tataw kaayo ang gihimo ni Joavan nga dili na siya ‘normal’ nga pagkatawo sa gihimo niini ngadto sa kapulisan nga igo rang nagtuman sa ilang trabaho.

Si Buenafe mitataw nga igo lang sila mi-assist sa kapulisan sa dakbayan sa Talisay human si Supt. Henry Biñas nangayo’g tabang kanila tungod sa presensya ni Joavan dinhi sa siyudad.

Segun sa report, si Mayor Michael Rama sa dakbayan sa Sugbu mibutyag nga iyang klaruhon kung wala bay nalapas ang kapolisan sa ilang operasyon niadtong Domingo apan kini daan nang miingon nga kung dunay sad-an silotan gyud ug walay ilhon si bisan kinsang malapason sa balaod.

‘Police did not harm him (Joavan) that’s why he escaped. The police tried to follow the rules and engagement gihatagan siya (Joavan) og chance to surrender that’s why we tried to stop him, alang-alang man ato siya pusilon but he tried to escape,” pasabot pang Buenafe.

Si Ylanan nga nahinabi sa mga tigbalita mihimakak nga ilang gi-ambush si Joavan ug dili niya tumong nga pusilon kini kondili ang ligid ra gyud sa sakyanan ni Joavan maoy iyang gipusil aron mohunong niadtong higayona sanglit nabutang na sab sa peligro ang ilang kinabuhi.

Miingon si Ylanan nga upat ka kaso ang ilang giandam batok kang Joavan kini mao ang Resisting Arrest, Assault to Persons in Authority, Damage to Government Property ug R.A 9165. (BANAT NEWS)