Magsuong lola giluba sa 'kawatan' og manok

CEBU, Philippines - Duha ka mga magsuong lola nga nagpangidaron og 65 ug 52-anyos ang gipangdunggab ug usa kanila ang napatay sa 21-anyos nga poultry worker sa sitio Lala-an sa barangay Bulasa lungsod sa Argao niadtong Domingo sa alas 9:30 sa gabii.

Ang biktima nga patay diha-diha human makaangkon og tulo ka samad dinunggaban sa dughan mao si Rita Sarno, 65, samtang kritikal ang manghod niini nga si Segundina Sarno Alvarado, 52, nga nakaangkon usab og samad dinunggaban sa dughan.

Samtang ang suspek mao ra usab ang ilang silingan nga si Adriano Camiguing, 21, helper sa usa ka poultry farm sa maong lugar kinsa mitahan dayon sa kapolisan.

Matud ni PO1 Bernard Banugon, Desk Officer sa Argao Police dihang nahinabi sa Banat News nga gikan sa trabaho ang suspek ug padulong na pauli ug dihang iyang naagian ang duha nadunggan niya kini nga namasangil siya maoy kawatan og manok sa ilang lugar.

Giingong napuno na ang suspek nga kini kanunay ang padungog-dungogon sa mga biktima hinungdan nga niadtong higayuna naatol usab nga naka-inom kini wala na siya makapugong ug gipangdunggab ang duha. (BANAT NEWS)