CEBU, Philippines - Usa ka 37-anyos nga lalaking nagproblema sa kwarta ang giingong napakyas sa iyang tinguhang paghikog ug nabalian hinuon sa iyang liog niadtong Sabado sa gabii diha sa barangay Candulawan, lungsod sa Minglanilla.
Sumala pa ni PO1 Abelardo Biton, duty desk officer sa Minglanilla Police Station nga nahinabi sa Banat News nga sa wala pa mahitabo ang insidente naglalis ang maong lalaki sa kapuyo niini tungod sa problemang pinansiyal.
Human niini naghubog-hubog si James (di tinuod pangalan) ug wala damha nga nagplano na diay kining maghikog tungod kay sunod kita sa kapuyo nagbitay na kini sa punoan sa Kaymito.
Ang kapuyo daling nanawag og silingan ug gidali pagtangtang gikan sa punoan sa kaymito si James nga dunay pisi sa liog apan demalas tungod kay giingong nabali-an kini sa li-og base sa taho sa Vicente Sotto Memorial Medical Center kang Biton.
Sa laing bahin, usa ka 15-anyos kinsa gituohang nahiubos tungod kay wala tugoting mohatud sa iyang iyaan ngadto sa airport ang naghikog gamit ang electrical wire kagahapon sa alas 7:00 sa buntag.
Si SPO3 Carmelito Hornales duty desk officer sa Toledo Police Station nga nahinabi sa Banat News kagahapon nagkanayon nga sa wala pa mahitabo ang insidente ang maong menor wala tuguting makahatud sa iyaan diha sa airport sa pagbalik niini sa London niadtong Sabado. (BANAT NEWS)