Mga polis gidasmagan ni Joavan

CEBU, Philippines - Tulo ka polis ang nalagpot sa kanal ug ang hepe sa Investigation and Detective Management Branch (IDMB) nagsuka-suka human nangabun-og sa kalawasan ug sa ulo human gikatahong gibanggaan og tuyo sa kontrobersyal nga sinagop sa mayor sa Talisay kagahapon sa kaadlawon diha sa Sindulan sa barangay Mabolo ning dakbayan.

Gipangita karon sa kapolisan ang sinagop ni Talisay City Mayor Socrates Fernandez nga si Joavan tungod sa maong hitabo nga nakaangol nila ni Chief Insp. George Ylanan, ang hepe sa IDMB ug mga sakop niining sila si PO3 Alner Maglinte, PO1 Allen Dignos ug PO3 Melbert Dio.

Ang kapolisan sa syudad sa Talisay ug kapolisan sa syudad sa Sugbo mipahigayon og joint operation kagahapon pasado ala-una sa kaadlawon aron i-serve ang warrant of arrest batok ni Joavan sa kasong Malicious Mischief apan nakaipsot kini human dasmagi ang maong mga polis.

Matud pa ni Ylanan nga nahinabi sa Banat News nga nakadawat sila og impormasyon kalabot sa presensya ni Joavan sa Sindulan sa barangay Mabolo.

Si Joavan adunay warrant of arrest sa kasong Malicious Mischief nga gipirmahan ni Judge Mario Manayon sa syudad sa Talisay kalabot sa pagbangga ni Joavan sa sakyanan sa kapolisan sa syudad sa Talisay pipila na ka bulan ang nakalabay.

Nasigpatan ang convoy ni Joavan nga naglangkob sa usa ka Honda Civic nga adunay plakang YEH-323 nga maoy gisakyan niini ug usa ka government vehicle nga Toyota Revo nga adunay plakang SGH-541.

Sa dihang mi-parking na ang Toyota Revo sa maong lugar nakabantay si Joavan ug wala molahos og parking ug milahos og padagan hinungdan nga gisundan nila kini apan kalit nga mi-U turn si Joavan.

Daling mikanaog si Ylanan ug gisangpit si Joavan sa paghunong tungod kay aduna kini warrant of arrest apan gipaarangkada ni Joavan ang awto padulong sa sakyanan sa IDMB.

Sa kabalaka ni Ylanan mibalik siya og sulod sa sakyanan ug igo lang siyang nakalingkod gibanggaan sila niini apan wala mohunong ug mipadayon sa pag-ikyas ug gidaro ang mga lingkuranan daplin sa dalan ug subling gidasmagan ang kilid sa sakyanan sa mga polis hangtud nga nakalusot kini.

Tungod niini gipusil sa mga polis ang ligid sa awto ni Joavan apan wala gihapon kini mohunong.

“Nahandos bitaw mi pagbangga niya kay kusog man ang impact, unya mao to nga miatras mi. Iya sad nga gidaro ang kilid nga naay mga lingkuranan unya kay wala man siya makaagi ang amo nasad nga kilid iyang gidasmagan, mao ‘to nga last judgment call nako nga pusilon nalang jud siya kay delikado naman sad mi og dili siya mohunong og bangga kami sad sulod sa sakyanan mapiit,” pasabot pa ni Ylanan.

Sa pag-ikyas na ni Joavan gidasmagan usab niini ang motor sa tulo ka backup nga polis nga sila PO3 Alner Maglinte, PO1 Allen Dignos ug PO3 Melbert Dio maong sila nangalagpot sa kanal.

Naabtan ang sakyanan niini diha na sa barangay Carreta apan giabandonar na kini. Nakuha sa sulod sa awto niini ang 20 ka gagmay’ng pakete sa gituohang shabu, usa ka pink pouch ug duha ka cellphone.

Samtang ang kauban ni Joavan nga luwan sa Toyota Revo nasikop dayon diha sa Sindulan nga giilang sila si Terence Bayani kinsa nakuhaan og disposable syringe nga adunay gituohang nubain sa sulod niini ingon man si Benedict Gabasa nga maoy nagmaneho sa Toyota Revo bisan wala kini lisensya.

Nakuha usab sa maong sakyanan usa ka medium pack nga transparent plastic pack, usa ka improvised sealer, usa ka rolled tissue ug usa ka toy gun.

Gisuwayan unta pagkuha sa Banat News ang habig sa duha ka kauban ni Joavan apan walay naningog kanila samtang sila si Talisay Mayor Socrates Fernandez ug Joavan dihang gitawgan ‘unattended’ usab ang ilang mga telepono. (BANAT NEWS)