Tresurera kinahanglang nagtuon og accounting

CEBU, Philippines - Si Kapitan Michael Ralota, presidente sa Association of Barangay Councils (ABC) naglaraw sa pagduso og resolusyon nga ang mahimong barangay treasurer kinahanglang gradwado o kaha nagkuha og kursong accounting nga may kabangkaagan sa paghan-ay sa tukmang sistema sa budget sa barangay.

Nasayran nga ang makalangan kanunay sa pagpatuman sa mga proyekto sa barangay mao ang kahinay sa pag-andam sa budget niini. Matud ni Ralota nga kasagaran sa mga kapitan magpaturagas lang og kuha og tresurera sa barangay nga bisan walay kaantigohan bahin sa accounting, ibutang sa katungdanan tungod lang kay nakatabang kaniya sa panahon sa election.

Apan matud pa ni Ralota nga kinaraan na kanang sistemaha, ang moderno karong paagi mao nga kinahanglang may hiantigohan sa paggama sa budget ang usa ka tresurera sa barangay aron nga dali kini makasumiter sa maong budget ngadto sa buhatan sa tresurero sa dakbayan.

Sa laing bahin, giawhag ni Ralota ang mga sakop sa ABC nga mobayad sa ilang P25 mil nga tinuig nga obligasyon ngadto sa ABC.

Kini tungod kay P709 mil nalang ang pundo karon sa ABC ug kuwang na kaayo nga ipanuweldo sa iyang mga kawani.

Ang buhatan sa ABC adunay 36 ka mga empleyado ug gahinan sila matag buwan og P320,000 alang sa ilang mga suweldo.

Gumikan niini, temporaryong gihunong ang hospitalization ug burial assistance alang sa mga barangay official ug empleyado gumikan sa kakuwang sa ilang pundo.

Ang maong benepisyo naglangkob sa P20,000 alang sa kapitan , P10,000 sa konsehal ug P5,000 sa mga empleyado.

Suma pa ni Ralota nga kung mamayad lang ang ilang mga sakop, makatigom unta sila og P7 million matag tuig.

Amenado si Ralota nga ang pagkalangay sa pag-aprobar sa budget sa mga barangay maoy usa sa hinungdan nganong naglisod ang kabarangayan sa pagbayad sa ilang amotan ngadto sa ABC matag tuig.

Samtang si Mayor Michael Rama mipadayag nga dili angay tagaan og hospitalization ug burial assistance ang mga sakop sa ABC nga dili mohatag sa ilang obligasyon. (BANAT NEWS)