Mga biyuda nakadawat hinabang

CEBU, Philippines - Laing mga kabanay   sa namatay nga mga piniriso sa Cebu Provincial Detention and Rehabilitation Center (CPDRC) nakadawat og financial assistance gikan sa probinsya sa Sugbo.

Ang tseke nga mobalor og tag P5mil ang matag usa, personal nga gitunol sa Provincial Social Welfare Development Office (PSWDO) ngadto kang Carmen Asingua, 37, nga maoy asawa ni Roldan Asingua nga taga barangay Hagnaya, lungsod sa   San Remegio   kinsa namatay sulod sa CPDRC niadtong Disyembre 24, 2010, ug Crisanta Lima, 71 , nga asawa usab ni Antonio Lima nga taga barangay Magay, lungsod sa Compostela.

Nasayran nga si Roldan Asingua , ang bana ni Carmen, mi-collapse ug nawad-an og panimuot human magduwa og basketball kauban sa mga binilanggo usab sa CPDRC.

Dali unta kini nga gidala sa tambalanan pero gideklarar kini sa mga doktor sa Vicente Sotto Memorial Medical Center nga dead on arrival.

Samtang si Antonio Lima, bana ni Crisanta, namatay niadtong Disyembre 28, 2010 tungod sa sakit nga diabetes, high blood , ug ingon man usab sakit sa kidney.

Matud pa nila ni Asingua ug Lima nga dako kaayo og ikatabang ang nadawat nilang hinabang gikan sa Kapitolyo alang sa ilang panginabuhi   ilabi na nga pulos sila daghan og mga gibuhing anak. (BANAT NEWS)