'Akyat bahay' napusilan

CEBU, Philippines - Samdan ang gipasanginlang banggiitang akyat bahay human kini nakigpinusilay sa mga sakop sa Theft and Robbery Section (TRS) nga armado og warrant of arrest nga buot untang modakop kaniya.

Si Kadapi Puyong, molupyo sa Quijano Compound sa barangay Calamba ang gibansagan sa TRS nga idlas nga kawatan sa Sugbo.

Matud pa sa hepe sa TRS Chief Insp. Bonifacio Garciano nga ilang gi-serve ang warrant of arrest nga gipirmahan ni RTC-Brach 58 Judge Gabriel Ingles batok sa suspetsado kini human usab gireklamo sa usa ka Mary Ann Romarate-Arnado sa kasong pagpangawat.

Ang TRS nakadawat og impormasyon nga naa kini sa usa ka hantakan sa maong lugar apan sa ilang pag-abot nakamatikod kini ug mikaratil og dagan.

Dali kining gigukod apan kalit kining namusil sa mga polis duha ka higayon apan walay nasamdan sa mga polis hinungdan nga kini gibawsan ug naigo sa lawas ug natumba.

Ang mga polis nakasakmit og usa ka kalibre .38 rebolber nga may duha ka buhing bala ug duha ka kabhang gikan sa suspek ug daling gidala sa Cebu City Medical Center ug giingong anaa pa sa kritikal nga kahimtang.

Samtang si SPO2 Jeoffrey Diola ang imbestigador sa TRS mibutyag sa bag-o pa siya sa TRS ‘tunog’ na kaayo ang pangalan ni Puyong isip usa sa labing ngilngig nga akyat bahay.

Midugang usab si Diola nga dili lang sa dakbayan sa Sugbo motira si Puyong kun dili lakip na sa norte ug sa habagatang bahin ug sa gawas nga bahin sa Sugbo.

Nagduda usab ang TRS nga si Puyong maoy mikawat sa pusil sa station manager sa sibyaanang DyHP nga si Atty. Ruphil Bañoc nga usa ka kalibre .45 ug mga bala niini diin nagkantidad og P60 mil sulod sa iyang aparador sa iyang apartment sa barangay Punta Princesa. (BANAT NEWS)