P35M ang balor sa nasakmit nga illegal drugs sa tuig 2010

CEBU, Philippines - Mosobra sa P35 milyones ang kinatibuk-ang kantidad sa nasakmit nga tanang klase sa ilegal nga drugas sa Philippine Drug Enforcement Agency (PDEA) Central Visayas inabagan sa ubang law enforcement agencies atol sa gihimong pagpangronda sa miaging tuig 2010.            

Si PDEA-7 regional director Adrian Alvariño nagkanayon nga ang ilang kalampusan dili matigayon kung wala pa ang dakong abag sa Philippine National Police (PNP), National Bureau of Investigation (NBI) ug Bureau of Customs (BOC).

Ang PDEA, maoy lead agency batok sa ginadili nga drugas nakasakmit sa kinatibuk-an og 900 gramos nga shabu nga mokantidad og kapin sa P6 milyones sa 79 ka operasyon sa miaging tuig itandi sa tuig 2009 nga miabot lang P350,000

Ang kapulisan dunay kinatibuk-ang 216 ka operasyon diin nasikop ang 507 ka drug personalities ug nakumpiskar ang 226 gramos nga shabu nga may street value nga P3 milyones, samtang sa tuig 2009 miabot lang og 145 ka operasyon ug nasikop sa kapulisan ang 419 ka tawo ug nakumpiskar ang gibana-banang 933 gramos nga shabu nagkantidad og P6.5 milyones.

Ang joint operations sa PDEA 7, PNP ug AFP nagmalampuson sa tanang pagpangronda nga miabot og kapin P26 milyones ang kantidad sa nasakmit nga shabu, marijuana ug cocaine.

Gawas niining dangerous drugs nga naglangkob sa shabu, marijuana ug cocaine, ang ubang law enforcement agencies nakasakmit usab og 162 nga nagkalain-laing klase sa armas ug duha ka sakyanan.

Subay niini, ang ubang law enforcement agency unit nakadakop usab og 713 ka tawo atol sa anti-drug operations diin 11 ka suspetsado anaa sa ilang target list ug 126 sa watch list samtang sa tuig 2009, 723 ang nadakpan ug walo kanila ang anaa sa target list ug 129 ang naa sab sa watch list.

Siya mitataw nga duna pay daghang operasyon nga ilang pagahimuon ilabina karun nga hingpit nang naapil ang Nalbuphine Hydrochloride kon naila nga Nubain nga usa na ka dangerous drugs.

“Its good that our law enforcement agencies are active in illegal drugs operation and because also of inter-agency cooperation,” matud pa niya sa press conference. (BANAT NEWS)