4 ka tawo na pud ang naghikog

CEBU, Philippines - Upat ang patay duha niini mga inahan samtang duha usab niini lalaki kini human pulos giingong naghikog tungod sa nagkadaiyang hinungdan sa managlahi nga lugar ug oras sa lalawigan ug syudad sa Sugbo.

Kagahapong adlawa pasado alas-5 sa kaadlawon sa barangay Pulpugan Uno lungsod sa Consolacion patay nang nakaplagan sa bana ang 45-anyos niining asawa nga giingong may nervous breakdown.

Sa pakighinabi sa Banat News ni SPO4 Joseph Yongco mibutyag kini base usab sa ilang nakuhang impormasyon nga nianang pagkagabii ang ginang ug iyang bana naghisgot kalabot sa iyang gi-antos niini nga sakit.

Matud pa ni Yongco wala magdahom ang bana nga mamat-an niyang magbitay na kini nga may hikot nga pisi sa liog gikan sa ilang kisame sayo pasado alas-5 sa kaadlawon.

Human sa unom ka oras laing inahan ang naghikog pasado alas-11 sa buntag kagahapon gihapon diha sa sitio Ipil-ipil Alaska Mambaling tungod kay giingong gibiyaan sa iyang anak ug sa banang Hapones.

 Ang 43-anyos nga inahan giingon usab nga adunay sakit usab sa pangisip.

Sa pakighinabi sa Banat News ni PO3 Ramon Bolongaita, Mambaling Police Station kinsa usa sa miresponde sa gihitaboan mibutyag kini nga nagbitay na kini sa kisame nga may gibulibod nga extension wire diha sa iyang liog.

Matud pa ni Bolongaita nga gisuwayan pa unta pagtabang sa mga silingan ang ginang apan midiwalwal na ang dila niini.

Midugang pa si Bolongaita nga base sa ilang nakuhang impormasyon gikan sa mga silingan sa namatay nga aduna kini banang Hapon apan gibiyaan ug wala na usab kini komunikasyon sa anak nga nagtrabaho sa Japan.

Samtang sa miaging kaadlawon (Huwebes) napalgang nagbitay sulod sa iyang bunkhouse ang usa ka 55-anyos nga construction worker   sulod sa usa ka unibersidad nga nahimutang sa dalan S. Osmeña, barangay Poblacion syudad sa Toledo.

Ang naghikog molupyo sa sitio Camansili barangay Talavera sa maong syudad kansang patay’ng lawas nakit-an sa gwardiyang si Ariston Gequilan Jr. nga nag-roving sa gitukod nga edipisyo sa maong tunghaan.

Nasayran sa kapolisan nga sa wala pa mahitabo ang paghikog niini, ang mga kaubanan nakamatikod nga labihang kahilumon niini sa nanglabay’ng mga adlaw ug pirmeng mag-inusara sa iyang bunkhouse.

Matud pa ni PO3 Jemelon Cotmaya, nga nakahinabi sa Banat News posibleng adunay problemang personal ang maong trabahante.

Samtang human sa lima ka oras, aduna na usab laing lalaki nga nagkutlo sa iyang kinabuhi sa barangay Media Once sa mao gihapon nga syudad.

Ang naghikog mao ang 21-anyos nga molupyo sa sitio Bawod sa nahisgutang barangay nga gituohang nagpusil sa iyang dughan diha sa kalibunan dili layo sa ilang balay.

Ang igsuon niini maoy nakakita sa patay’ng lawas nga naglunang na sa dugo hinungdan nga daling nangayo og tabang sa kapolisan.

Nasuta sa mirespondeng mga polis nga aduna kini samad pinusilan sa walang bahin sa dughan ug napalgan diha sa iyang tupad ang usa ka kalibre .22 nga armas nga gituohang maoy gigamit sa pagkutlo sa iyang kinabuhi. (BANAT NEWS)