'Suyopanan' sa Carreta gironda, tag-iya dakpan

CEBU, Philippines - Tag-iya sa balay nga giingong suyopanan sa mga 'adik' nadakpan sa mga ahente sa Philippine Drug Enforcement Agency (PDEA) Central Visayas atol sa gipahigayong buybust operation sa miaging gabii diha sa sitio Ponce sa barangay Carreta siyudad sa Sugbu.

Ang nadakpan ug nakuhaan og ubay-ubay nga pakete sa gituuhang shabu mao si Armando Regner, 45, nagpuyo sa nahisgutang lugar.

Si Jessie Tabanao tigpamaba sa PDEA nga gikahinabi sa Banat News nagkanayon nga ilang gipanid-an ang kalihokan ni Regner human sila makadawat og impormasyon nga namaligya kini og shabu ug ang balay niini maoy gihimong suyopanan sa mga 'adik'.

Matud ni Tabanao nga ilahang gipalitan og shabu niadtong nakalabay’ng adlaw ang suspek ug ang ilang gisugo ilahang gipadad-an og camera ug nakuhaan ang tulo ka lalaking nanuyop og shabu.

Midugang siya nga natigayon ang buybust operation nga gipangulohan ni Intelligence Officer-3 Mark Maramba human gitunol ni Regner ang duha ka paketeng shabu nagkantidad og P400 ngadto sa ilang posuer buyer.

Laing nakuha sa posesyon ni Regner ang 31 ka pakete nga gituohang ang sulod shabu gawas sa laing duha ka pakete sa buy bust ug drug paraphernallia.

Matud ni Tabanao nga kasagaran sa iyang gipamaligyaan mga tinun-an diha sa Carreta ug mga taxi drayber diin matag semana makahalin ang suspek og 20 ngadto sa 30 ka paketeng shabu.

Samtang nasikop usab ang managsuong gidudahang namaligya og nubain atol gihapon sa gihimong buybust operation sa PDEA pasado alas-4 sa hapon sa susama gihapong adlaw diha sa barangay Pardo ning siyudad nga sila si Gary Graba, 42, ug Roel, 32, pulos molupyo sa nahisgutang lugar.

Ang duha ka managsuong Graba nakuhaan og duha ka nubain human gibaligya ngadto sa posuer buyer sa PDEA. (BANAT NEWS)