CEBU, Philippines - Subling gihangyo ni Lapulapu City Mayor Paz Radaza ang mga sakop sa Barangay Peace Action Teams (BPAT) sa mga kabarangayan sa pagmonitor sa krimen 24 oras.
Kini nunot sa sunodsunod nga mga pinatyanay nga nahitabo sa maong dakbayan diin ang labing ulahing biktima niini mao ang usa ka ginang nga gitulis ug gipusil patay sulod sa usa ka traysikol sa milabay’ng adlaw sa Barangay. Gun-ob dakbayan sa Lapulapu.
Matud pa ni Radaza nga makatabang kaayo og dako ang mga sakop sa BPAT sa kasulbaran sa krimen nga mahitabo sa ilang tagsatagsa ka dapit .
Samtang gihangyo usab ni Radaza ang kapolisan pinaagi ni Lapulapu City Police Office Director Sr. Supt. Anthony Obenza nga pakusgan ang kampanya batok sa kriminalidad aron dili moislag ang mga turista gikan sa Lapulapu.
Iyang giawhag nga kinahanglang magtambayayong ang kapolisan ug ang komunidad sa pagsulbad sa mga krimen nga mahitabo sa dakbayan matag karon ug unya. (BANAT NEWS)