City Vet sa Mandaue gihulga

CEBU, Philippines - Nakadawat og hulga sa iyang kinabuhi ang city veterinarian sa Mandaue nga si Daisy Pebetrante pinaagi sa text message nga nadawat niini niadtong Biyernes sa miaging semana.

Si Penetrante nga midangop sa kapolisan tungod sa maong mga pagpanghulga sa iyang kinabuhi ug mipadayag nga maoy iyang pagtuo nga aduna kini kalambigitan sa iyang trabaho.

“Daku na mi alkanse basin gusto ka nga mosunod sa vetenarian sa Talisay. Gamay na lang panahon,” nagkanayon ang text message nga nadawat ni Penetrante.

Si Penetrante nga nahinabi sa Banat News mipadayag nga wala siya batia og kahadlok sa maong mga pagpanghulga sanglit wala man usab siyay gihimong dautan sa iyang trabaho.

Gitataw niya nga nakasinati na siya og susamang mga pagpanghulga kaniadto apan nasayran nga kauban lamang usab niya sa trabaho.

Nagtuo si Penetrante nga ang mga importer sa karne ang nanghulga kaniya tungod kay higpit man nilang gipatuman ang mga lagda nga gilatid alang sa pagpamaligya og imported nga karne sa maong dakbayan.

Kahinumdoman nga sa miaging mga bulan gisakmit sa ilang grupo ang mga karne nga gipamaligya diha sa dakbayan gikan sa ilegal nga ihawan.

Lakip sa ilang gisakmit ang mga inasal nga nasuta usab sa iyang buhatan nga illegal ang pag-ihaw niini. (BANAT NEWS)