2 Ka polis sa tabuelan gipa-drug test

CEBU, Philippines - Duha ka polis nga nadestino sa lungsod sa Tabuelan ang gidisarmahan ug gipaubos kagahapon sa random drug test human giingong tiggamitan og ginadiling drugas.

Matud pa sa hepe sa kapolisan sa lalawigan Sr. Supt. Erson Digal nga ang duha ka polis (ngalan gipugngan) nga nadestino sa maong lungsod tiggamitan og ginadiling drogas.

Midugang si Digal nga ang maong taho gikan ra usab sa usa ka opisyal sa usa ka barangay hinungdan nga gipasusi niya sa Provincial Anti-Illegal Drugs Special Task Group (PAIDSOTG) ang kalihukan sa duha.

Kagahapong adlawa gipatawag dayun ni Digal ang duha sa headquarters nga wala pahibaw-ang ipaubos na diay sila sa drug test.

Butyag usab ni Digal nga kun ugaling mapamatud-ang positibo ang duha mataktak gyud sila sa ilang serbisyo.

Samtang mibahad usab si Digal sa kapolisan nga nadestino sa lalawigan sa Sugbo nga naggamitan og ginadiling drugas nga hunongon na ang ilang bisyo.

Nasayran nga ang resulta sa drug test ipadala pa usab kini sa Manila alang sa confirmatory test.

Kahinumduman nga ang hepe sa kapolisan sa Central Visayas Chief Supt. Ager Ontog Jr. mipahigayon usab og random drug test sa pipila ka kapolisan dili palang dugay.

Mibahad kining puohon ang mga adik nga polis sa PRO-7 nga mihugaw-hugaw sa pangalan sa ilang organisasyon.

Usa ka polis sa Minglanilla nga si SPO1 Roberto Canencia ang nakasuhan human giingong nasakpang nagsuyop sa akto atol sa gipahigayong anti-illegal drugs operation sa Regional Anti-illegal Drugs special operation task group (RAIDSOTG) duha ka semana na ang nakalabay. (BANAT NEWS)