Mga barko gipabiyahe na

CEBU, Philippines - Nakadagan na ang mga sakyanan sa kadagatan nga wala pabiyahia sa mga otoridad sa kadagatan gumikan sa dautang kahimtang sa panahon sa miaging Miyerkules.

Si Captain Anelito Gabisan, Coast Guard District Central Eastern Visayas deputy commander mibutyag nga gumikan sa kadagko sa bawod sa dagat may pito ka mga barko ug upat ka mga bangka sa Sugbo ug laing tulo ka mga barko sa Dumaguete nga mikanselar sa ilang biyahe sa migaing Miyerkoles, mipadagan na kagahapon sa ilang mga sakyanan.

Hinuon giklaro ni Gabisan nga boluntaryo ang maong suspension sa biyahe sa maong mga sakyanan kay ang Coast Guard wala man moluwat og advisory nga nagdili kanila sa pagbiyahe tungod kay walay bagyo niadtong adlawa.

Apan ang mga kapitan sa barko mibuluntaryo nalang sa pagkanselar sa ilang biyahe, sa kabalaka nga basin mahisama sila sa nangaging panghitabo diin daghang nangamatay nga pasahero gumikan kay mipugos gyud pagbiyahe bisan dili maayo ang kahimtang sa panahon.

Sa laing bahin, si Manager Nigel Paul Villarete, sa Mactan-Cebu International Airport Authority nagkanayon nga walay gikanselar nga mga biyahe sa eroplano bisan dili maayo ang kahimtang sa panahon sa miaging adlaw.

Si Ella Comahig sa Philippine Atmospheric Geophysical and Astronomical Services Administration (PAGASA) Mactan nagkanayon nga adunay low pressure area nga nasigpatan sa miaging hapon didto sa South East sa Zamboanga City.

Matud ni Comahig nga ang tibuok rehiyon makasinati og pagbunok   sa uwan ug dagkong bawod sa kadagatan tungod sa hanging amihan ug ikog sa nagkapupos nga kabugnaw sa panahon.

Si Comahig midugang nga base usab sa bana-bana sa panahon ang Sugbo makasinati og ma-arang-arang nga panahon ugma Sabado ug Domingo. (BANAT NEWS)