Rama mohangyo sa DPWH

CEBU, Philippines - Gitakdang pakigkitaan ni Mayor Michael Rama si Kalihim Rogelio Singson sa DPWH aron hangyoon nga gawas sa paghimo og mga flyover ug sky walk, atimanon usab niini ang pagpalambo sa drainage system.

Suma pa sa mayor nga angayan nga magtinabangay ang nagkadaiyang ahensya sa gobyerno aron dili na mahitabo pag-usab ang mga pagbaha.

“Dili lang dapat nga puros flyover ug skywalk lang , ang naa sa mga kilid , tagaan pud og pagtagad,” nagkanayon ang mayor.

Giklaro hinuon sa mayor nga dili siya supak sa pagpatukod og flyover ug skywalk sanglit dako usab kaayo kini og tabang sa pagpaluag sa trapiko.

Gitataw hinuon ni Rama nga kinahanglang balance ang paghatag og serbisyo ngadto sa katawhan ilabi na sa mga inprastraktura.

Sa laing bahin, nakaalerto gihapon karon ang siyudad sa pagpahawan sa mga illegal nga nagpuyo sa kasapaan

Si Rama miawhag sa mga eskuwater nga mokooperar sa ilang operasyon sanglit alang man usab kini sa ilang kaluwasan.

Kahinumdoman nga kapin sa 3,000 ka mga pamilya ang maapektohan sa demolisyon nga himoon sa Squatters Prevention, Encroachment and Elimination Division.

Giklaro hinuon sa hepe sa SPEED nga si Noel Artes nga kanunay sila nga mopahibalo sa mga tawo nga maapektohan sa demolisyon aron dili kini makalitan kun demolison na sila. (BANAT NEWS)