Konduktor giluba patay sa pasahero
CEBU, Philippines - Usa ka konduktor sa jeep nga pasaheroan giluba patay sa wala hiilhi niyang pasahero didto sa eskina sa Sonny Hills sa barangay Talamban, siyudad sa Sugbo kagahapon sa alas 6:00 sa buntag.
Ang biktima mao si Jerlan Iba alias ‘RR’ , 30 , nga taga sitio Basaba, Cantabaco, Lutopan sa dakbayan sa Toledo.
Ang mamumunong pasahero gihulagway lang nga dakuon og lawas, itumon, nag- short og maong ug nagsul-ob og itom nga t-shirt
Si Jurem Parame nga maoy drayber sa 13-C nga PUJ mibutyag sa kapolisan nga paingon sila sa Colon niadtong higayona gikan sa Talamban dihang pag-abot nila sa eskina Sonny Hills mihunong siya samtang nanawag og pasahero ang biktima dihang giatake kini sa kriminal ug gitusaktusak sa iyang kutsilyo ang lawas.
Dihang nahagba na sa yuta ang biktima nga naglunang sa iyang dugo misirit dayon ang kriminal pahilayo sa maong lugar.
Sa gihimong pakisusi sa mga sakop sa Scene of the Crime Investigation Unit (CSIU) nasuta nga may upat ka samad dinunggaban ang biktima diin duha sa iyang liog, usa sa ilok ug usa sa bukobuko nga maoy nakaingon sa iyang pagkamatay diha dayon.
Gipangita pa sa kapolisan ang criminal. (BANAT NEWS)
- Latest
- Trending
