Polis sa Mandaue gilahugay

CEBU, Philippines - Pormal nang milingkod kagahapon ang mga opisyal sa nagkadaiyang police station ug mga special unit sa Mandaue City Police Office (MCPO) human kini lahugaya ni MCPO Director Sr. Supt. Noel Guillamac.

Base sa kamandoan ni Guillamac, ang mga naapektohang opisyal mao sila ni Sr. Insp. Abraham Ocampo nga gikan sa Station 1 ngadto sa IDMB, Insp. Elmer Fernandez, maoy mopuli sa station 1, Sr. Insp. Franco Oriol gikan sa mobile patrol ngadto sa Station 2, Sr. Insp. Orlando Carino gikan sa station 6 ug mao na karon ang modala sa PCR, Insp. Zosimo Jabat sa CAIDSOTF ibalhin kini ngadto sa Station 6.

Lakip sa naapektohan mao ang mga Deputy Chief diin si Insp. Alexander Munez sa station 2 gibalhin sa station 1, Insp. Mark Barrios gikan sa station 6 diin maoy Deputy Chief sa Intelligence section, Insp. Harris Bangcolita gikan sa station 1 ngadto sa CAIDSOTF., Sr. Insp. Herardo Fiel sa station 1 ngadto na sa station 2 isip deputy, Insp. Ariston Bataluna gikan sa MCPO ngadto na sa station 6 ug Insp. Antonio Cervantes maoy bag-ong Deputy Chief sa Station 3.

Matud pa ni Sr. Supt. Guillamac ang maong lahugay maoy paghatag sa iyang mga bag-ong opisyal nga nadestino sa dakbayan sa Mandaue sa MCPO nga makasuway sa paggunit og usa ka unit sa ilang pagserbisyo ngadto sa katawhan. - BANAT NEWS