Talisay nangandam sa mga katalagman

CEBU, Philippines - Ang kagamhanan sa dakbayan sa Talisay nangandam na sa umaabot nga emerhensiya niining sunod-sunod nga pagbunok sa uwan.

Kahinumdoman nga ang Talisay gideklara kaniadto sa Department of Environment and Natural Resources (DENR) nga landslide prone area.

Si Talisay City Administrator Richel Bacaltos nga nahinabi sa Banat News kagahapon nagkanayon nga gipahimangnoan na nila ang mga kapitan sa 22 ka barangay sa siyudad nga magmabinantayon ug ialarma ang ilang mga residente aron kung ugaling adunay mahitabong insidente nga mugna sa kinaiyahan walay mga madisgrasya.

Matud ni Bacaltos nga giandam na usab sa siyudad ang mga dump truck ug mga heavy equipment nga magamit kung ugaling adunay mahitabong pagdahili sa yuta ug ang mga tunghaan nga mabakwitan sa mga pamilyang maapektohan.

Gawas niini ang siyudad migama og team nga gilangkuban sa mga buhatan sa city social welfare, city health, city engineering ug Bureau of Fire Protection nga nagsuroy-suroy sa mga lugar nga daplin sa kabaybayonan, kasapaan ug ngadto sa kabukiran.

Niadtong Martes ang nahisgutang team unang misuroy sa mga lugar dapit sa kasapaan ug kabaybayonan ug kagahapon miadto na usab sila sa mga bukirang barangay.

Ang tumong sa maong grupo mao nga mahibaw-an ang sitwasyon sa mga residente sa daplin sa kabaybayonan, kasapaan ug kabukiran. Si Bacaltos nagkanayon nga ang maong team gihatagan og panahon kutob sa Miyerkules sunod semana sa paghuman sa ilahang mga gimbuhaton aron mapresentar nila ang ilang assessment sa sitwasyon sa mga residente atol sa ipahigayong meeting tali sa Local Risk Reduction Management Council ug matun-an ang angayan nga buhaton sa pagluwas sa mga residente gikan sa peligro. - BANAT NEWS