Nag-sideline og habal-habal gipatay

CEBU, Philippines - Patay diha dayon ang usa ka drayber sa habal-habal human gipusil sa wala mailhing mamumuno pasado alas-8 sa miaging gabii diha sa sitio Tigbao sa barangay Talamban siyudad sa Sugbu.

Dili pa ma-establisar sa kapulisan kun gisakyan o giatangan sa mamumuno ang biktima samtang namasahero sa iyang motorsiklo nga Honda Wave kolor itom ang biktimang si Antonieto Flordiles ,40, taga Purok 3 sa barangay San Jose.

Sa pasiunang pakisusi sa mga sakop sa Homicide Section sa Cebu City Police Office (CCPO) nila ni SPO4 Alex Dacua, PO2 Michael Codaste, PO2 Edario Manatad ug PO2 Jodan Batucan nasuta nga dunay duha ka buslot sa bukobuko ug duha usab sa dughan nga agi sa pinusilan sa wala pa sab matinong kalibre sa armas nga gigamit sa mamumuno.

“Dili pa ta ka determine kun asa ang entry point sa bala kay kun sa dughan ba o sa luyo,” asoy pang Batucan sa dihang nahinabi sa Banat News.

Matud ni Batucan nga sa inisyal nilang imbestigasyon pag-abot nila sa crime scene ang motorsiklo sa biktima natumba na. Matud ni Batucan dunay guwardiya sa atbang sa crime scene nga nakadungog og duha ka sunodsunod nga buto sa armas ug sa dihang gisusi niini nagkadugo na ang biktima ug dunay samad pinusilan.

Ang maong krimen nahitabo gyud nga nagpunay og uwan pa kagabii daling gitabang ang biktima ug gidali paghatud sa North General Hospital apan gideklarar sa mga doctor nga Dead on Arrival (DOA).

Giangkon sa kapulisan sa pagkutlo ning balita wala pa sila’y motibo ug posibleng pag-ila sa nagpusil sa biktima sanglit wala sab silay saksi.

Matud pang Batucan mohimo pa sila og background check sa biktima kay nakakuha sila og I.D niini isip usa ka guwardya diha sa posesyon niini maong apilon nila kini sa pagsusi. - BANAT NEWS