3 batang gianod sa Mactan Channel naluwas

CEBU, Philippines - Naluwas ang tulo ka bata gikan sa hingpit nga kamatayon human sila mangaanod sa kusog nga sulog sa kadagatan sa sitio Bahara sa barangay Omapad dakbayan sa Mandaue sa milabay’ng hapon.

Ang mga bata mao sila ni Eleazar Tac-an, 11, residente sa maong dapit, Jovannie Aton, 16, nagpuyo sa barangay Ibabaw dakbayan sa Mandaue ug Jason Perez Abing.

Nasayran nga mga alas 3:30 sa milabay’ng hapon sa daplin sa baybayon sa Omapad dakbayan sa Mandaue si Tac-an naanod sa dagat gumikan sa kakusog sa sulog. Maayo nalang kay nakita si Tac-an sa duha ka tinun-an nga sila si Jovanie Aton, 16, ug Jason Perez ug ilang gisuwayan sa pagluwas sa biktima. Unang misuway sa pagluwas mao si Aton apan wala kini makakaya hinungdan nga siya na usab ang nangayo og tabang ngadto kang Perez.

Dali usab nga mi-dive si Perez apan bugtong si Aton lang ang nadala niini samtang si Tac-an wala na niya makab-ot ug padayon kining gianod sa dagat.

Pipila ka gutlo nakita sa usa ka mananagat si Tac-an hinungdan nga iya kining gigukod ug giluwas ang maong bata.

Dali kining gidala sa tambalanan sa Mandaue ug sa dihang misuka og tubig luwas na kini ug pwede na kining mouli sa ilang mga mahal sa kinabuhi nga luwas. - BANAT NEWS