11-anyos gilugos sa uyoan ug ig-agaw

CEBU, Philippines - Usa ka 11- anyos nga batang babaye nga tinun-an sa grade four kaduha nabiktima sa pagpanglugos sa tanod nga kapuyo sa iyang iyaan ug iya mismong ig-agaw sa managlahing bulan ug petsa sa miaging tuig sa usa sa mga barangay sa lungsod sa Barili.

Apan sigun sa report sa kapulisan sa Barili naduso ang kaso ngadto sa Provincial Prosecutors Office niadtong Enero 14 sa miaging bulan.

Matud pa sa report ang 11-anyos nga biktima misaysay sa kapulisan nga niadtong Agosto 27, sa miaging tuig gipahimuslan siya maong tanod diha sa pinuy-anan niini. Wala siya mosumbong sa nahitabo tungod sa kahadlok human siya gihulga sa suspetsado. Apan niadtong Disyembre 18 gilugos na sab ang biktima ug ang naglugos kaniya mao ang iyang 35-anyos nga ig-agaw sulod sa tindahan sa usa sa ilang paryente.

Ang kapulisan sa Barili mirekomendar nga ipailawom ang biktima sa Medical Examination and Psychological Evaluation at Women and Children Friendly Center diha sa Vicente Sotto Memorial Medical Center (VSMMC).

Si SPO3 Elsa Albuera sa Womens Desk sa Barili Police station nga nahinabi sa Banat News mitug-an nga positibong nahilabtan ang biktima.

Matud ni Albuera nga nalangay ang ilahang imbestigasyon sa bata ug milanat pag pipila ka semana tungod kay naa pa sa ‘state of shock’ ang biktima ug wala dayon mokooperar sa ilang imbestigasyon.

Gani nagkanayon si Albuera nga ilaha nalang gipaestoryahan sa inahan ang nahitabo tungod kay wala dayon nakarekober ang biktima. Ang bata giingong gihulga sa tanod ug dunay gitanyag nga kwarta bugti sa dili pagsumbong ni bisan kinsa.

Matud ni Albuera nahitabo ang pagpanglugos sa biktima sa balay mismo sa tanod kay wala diha ang kapuyo niini nga iyaan sa biktima kay nitrabaho niadtong higayona.

Ang duha ka suspetsado padayong gipangita sa kapulisan human nanglayas. - BANAT NEWS