CEBU, Philippines - Nahanaw ang P40 mil nga kuwarta human lungkaba sa wala hiilhing kiriwan ang treasurer’s office sa Saint Gabriel Parish Church sa barangay Poblacion, sa lungsod sa Santander niadtong Domingo sa buntag.
Apan gituohan nga niana pang kaadlawon sa maong adlaw lungkaba ang maong opisina pinaagi sa pagguba sa gamay nga padlock sa gate sa dakong pultahan sa kombento ug didto na molusot paingon sa treasurer’s office ang kawatan.
Ang kawatan giingong miguba sa door knob ug sa drawer nga gipanag-iya ni Leonidas Buscato ug gikuha ang P40 mil nga kinitaan sa simbahan.
Sa pasiunang pakisusi sa kapolisan, ang kiriwan misulod usab sa stockroom apan wala kini makakawat didto kay walay sulod nga kuwarta ang wooden box sa maong lawak.
Si PO2 Noel Estender sa Santander Police Station nagkanayon nga gisusi nila karon ang anggulo nga inside job sanglit suhito kaayo ang kawatan bahin sa nahimutangan sa kuwarta.
Gani midugang siya nga ang buhatan sa cooperative nga anaa ra sa duol, wala sudla sa kawatan kay nasayod kini nga wala siya’y madawdaw sa maong lawak.
“Suhito siya ug asa ang kwarta gibutang, busa posible nga permi ni siya sa kumbento,” matud pang Estender.
Hinuon nagkanayon si Estender nga may gidudahan na sila karong tawo nga posibleng maoy nanglungkab apan dili pa nila ibutyag ang ngalan niini. (BANAT NEWS)