Gisablok og sabaw sa hiniktan tiklo

CEBU, Philippines -  Usa ka tawo kinsa gisablok og init nga sabaw sa manok nangawat og hiniktan kay gusto niyang sabwan aron makahigop og sabaw niini dihang nasakpan siya ug gisikop sa mga barangay tanod didto sa barangay Cambaro, dakbayan sa Mandaue sa miaging gabii.

Ang nadakpan mao si Antonio Atop Jr., ulitawo nga taga barangay Mantuyong sa maong dakbayan.

Ang hiniktan nga gikawat sa suspetsado gipanag-iya ni Direk Lumapas   sa Cambaro.

Si PO2 Antonio Discartin sa kapolisan sa Presinto 5 sa Opao Police Station nga nahinabi sa Banat News miingon nga ang mga silingan ni Lumapas maoy nakakita sa suspetsado nga misulod sa compound sa mga Lumapas ug gikuha ang hiniktan nga diha sa tangkal.

Gumikan niini mitawag dayon sila sa mga barangay tanod aron mapakgang ang kawatan. Sila si Victor Dmocol ug Ernesto Pepito maoy miadto dayon sa maong lugar ug maoy migukod sa suspetsado kinsa padulong nang mosibat dala ang hiniktan.

Dihang naapsan gipusasan dayon ug gidala sa presinto sa kapolisan.

Sa pagsukitsukit nga gihimo sa kapolisan, ang suspetsado mitug-an nga dugay na kaayong wala siya makahigop og init nga sabaw sa manok hinungdan nga nakahukom siya sa pagkawat sa hiniktan ni Lumapas.

Apan wala siyay suwerte kay gawas nga wala siya kahigop og init nga sabaw, mikagulkol pa gyud siya sa prisohan. (BANAT NEWS)