Nag-skate board ligsan patay

CEBU, Philippines -  Patay ang usa ka 8 anyos nga batang lalaki human maligsi sa sakyanan samtang nagduwa og skate board sa ilawom sa Marcelo Fernan Bridge sa sitio San Roque sa barangay Pusok dakbayan sa Lapulapu sa miaging hapon.

Ang biktima mao si James Mosqueda nga molupyo sa maong dapit samtang ang nakaligis kaniya nga usa ka Toyota Van type nga may plate number GXK 520, gimaneho ni Jimmy Caballero Toso, 51, minyo, nga taga Cabancalan 1, Bulacao, dakbayan sa Sugbo.

Si Inspector Christian Torres, hepe sa traffic division sa Lapulapu City Police Office ( LLCPO) nga nahinabi sa Banat News miingon nga kuyog sa biktima ang iyang mga higala nga nagduwa og skate board sa maong dapit.

Unya migawas kini sa gutter sa karsada nga mao usay pag-agi sa sakyanang gimaneho ni Toso ug nalatayan gyud ang biktima sa mga ligid sa van.

Dali nga gipahunong ni Toso ang sakyanan ug gilili ang ilawom sa pangulahing ligid niini diin didto ang biktima nga nagkadugo na.

Ang mga sakop sa Emergency Rescue Unit Foundation (ERUF) maoy mikuha sa biktima sa ilawom sa sakyanan ug dali kining gihatod sa Mactan Doctors Hospital diin kini ideklarar sa mga doktor nga dead on arrival.

Matud pa ni Inspector Torres nga si Toso mitahan usab ngadto kanila human sa maong aksidente gibalhog dayon nila sa prisohan samtang kasong   reckless imprudence resulting to homicide ang kaso nga ilang ipasaka batok niini. (BANAT NEWS)