VM Young gi-warningan ni Gwen

CEBU, Philippines -  Giwarningan ni Gobernador Gwendolyn Garcia ang bise mayor sa dakbayan sa Sugbo nga magbantay sa iyang dila, samtang giisip niya nga ang bise mayor nakahimo og usa ka "very irresponsible statement" bahin sa mga eskuwater ning dakbayan.

Ang maong warning gihimo sa gobernador human mabati niini gikan sa baba ni Vice Mayor Augustos Young kinsa mipasangil nga pulos gikan sa kalungsoran sa lalawigan ang tanang namuyo nga eskuwater sa daplin sa kasapaan sa dakbayan sa Sugbo.

Matud pa sa gobernador nga ang pag-angkon ni Young nga ang maong mga eskuwater nagparehistro na sa siyudad sa Sugbo bisan kun taga lalawigan, nagpasabot lamang nga gigamit kini sa mga politiko sa siyudad sa Sugbo panahon sa eleksyon.

Sigun pa ni Garcia nga si Young nagpadayag lamang nga ang ilang tumong sa pagpapuyo sa 3,500 ka mga tawo sa Mahiga Creek para lamang kini mobotar kaniya ug sa uban pang opisyal sa dakbayan sa panahon sa election, apan karong human na ang piniliay, wala nay lami kining mga tawhana.

Sa iyang bahin, ang gobernador nagkanayon nga basta Sugboanon, wala siyay pinalabi, lahi kang Young nga walay bili kaniya ang taga lungsod.

Gumikan niini gipahimangnoan sa gobernador si Young isip usa ka responsable nga opisyal sa siyudad sa Sugbo nga magmatngon sa mga buhiang pamahayag niini batok sa mga Sugbuanon.

Gani matud pa sa gobernador nga angay hiusahon ang paghatag og solusyon sa maong problema ilabi na ang paghimo og master plan sa mga imbornal ning dakbayan.

Kini tungod kay dugay na kaayo kining problemaha apan walay nahimo ang mga kadagkoan sa dakbayan sa pagpatuman sa maong master plan nga maoy hinungdan sa kabug-at sa maong suliran sa panahon nga ting-uwan.

 Kahinumdoman nga mipagawas og pamahayag si Young nga mipasangil sa mga eskuwater sa Mahiga creek nga maoy usa sa mga hinungdan nga mobara ang dagayday sa tubig sa maong sapa sa panahon nga mobundak ang kusog nga uwan. (BANAT NEWS)