Junkshop gironda, pito 'karnap' nga motor nasakmit

CEBU, Philippines - Pito ka mga motorsiklo nga gituohang gikarnap ug gibaligya sa junk shop ang narekober sa mga sakop sa City Intelligence Branch (CIB) ug Theft and Robbery Section (TRS) sa Cebu City Police Office (CCPO) atol sa gihimong operasyon kagahapon sa kaadlawon diha sa sitio Kalinaw sa barangay Tangke siyudad sa Talisay.

Gisikop sa kapulisan ang tag-iya sa junkshop nga giila nga si Teofilo Daitol ,56, nagpuyo sa nahisgutang lugar.

Si Chief Insp. Bonifacio Garciano, hepe sa TRS nga nahinabi sa mga tigbalita nagkanayon nga taud-taod na nilang gipanid-an ang mga junkshop nga gidudahang kakunsabo sa mga kawatan og motorsiklo.

Matud ni Garciano niadtong miaging semana dunay usa ka complainant mipatim-aw sa ilang buhatan ug miasoy nga gikarnap iyang motorsiklo ug nasigpatan sa junkshop ni Daitol.

Hinungdan nga ilahang gipanid-an ug positibo nga anaa ang motorsiklo sa maong complainant.

Kagahapon sa kaadlawon ang TRS pinangulohan ni Garciano ug CIB pinangulohan ni Chief Insp. Romeo Santander ilang gilusad ang operasyon ug ilang narekober ang pito ka nagkalain-laing motorsiklo diha sa junkshop ni Daitol.

Si Daitol mirason sa mga tigbalita nga igo lang gi-prenda kaniya og usa ka libo ang mga motorsiklo unya pagkasunod adlaw balikon sa nagprenda nga magdala na og kauban nga mao kunohay ang molukat.

Gihimakak niya nga dili siya kunsabo sa mga karnaper sa motorsiklo sanglit wala usab siya kahibawo nga kinawat diay ang motorsiklo nga gi-prenda kaniya.

Matud ni Daitol nga dunay magprendahan kaniya nga duha ka lalaki nga taga Minglanilla nga gihulagway niini nga taason ug itomon ang pamanit.

Ang katapusang gi-prenda ni Daitol niadto lang Sabado mao ang Rusi kolor green nagtangag sa plakang GI-9076 ug laing Rusi nagtangag sa plakang GU-2462 mga upat na ka buwan nga wala na lukata hinungdan nga gigamit nalang usab niya kini.

Ang ubang mga motorsiklo gipisa-pisa na, samtang ang uban gikuhaan og makina. Matud pang Garciano nga ilaha gihapong pasakaan og kasong kalapasan sa Anti-Fencing Law si Daitol gumikan sa kapakyas niya pag-report sa kapulisan.

    Midugang si Garciano nga duha ngadto sa tulo ka grupo ang ilahang gipanid-an karun diin kasagaran niini nga kawaton mao ang XRM nga motorsiklo.

Giawhag ni Garciano kadtong nawad-an og motorsiklo sa pagbisita sa ilang buhatan aron ilhon ang mga motorsiklo nga anaa karun sa Camp Sotero Cabahug.

Apan kinahanglan magdala sila og mga dokumento nga nagpamatuod nga ilaha ang maong motor. (BANAT NEWS)