Norwegian nagpasalba sa armas tiklo

CEBU, Philippines - Usa ka Norwegian national kinsa mipasalba sa iyang armas de fuego sa sulod sa usa ka imnanan sa barangay Basak, dakbayan sa Lapulapu   gisikop sa kapolisan sa miaging gabii.

Ang mikagulkol dayon sa prisohan mao si John-Erik Hansen, 47, lumad nga taga Oslo City, sa nasud sa Norway ug kasamtangang nagpuyo sa BF Town Homes sa barangay Pajac, dakbayan sa Lapulapu.

Si SPO2 Rolando Pogoy sa Investigation Detection and Investigation Bureau (IDMB) sa kapolisan sa maong dakbayan nga nahinabi sa Banat News miingon nga ang maong langyaw nag-inusara nga misulod sa Chille Paper Bar, unya miinom kini og pipila ka botelya nga beer.

Matud pa ni SPO2 Pogoy nga nangita og pansayan ang maong langyaw aron ipahungaw ang sugo sa iyang lawas.

Unya dihang gitudloan sa waitress sa ilang CR kalit lamang kining nasuko ug milanit sa iyang armas nga kalibre 45   gikan sa iyang knapsack ug walay igong hinungdan nipasalba niini.

Busa puwerting lisanga sa ubang mga kustomer sa maong bar ug aron paglikay nga mapagan sila sa pagpanghagis sa maong Norwegian nag-iyahay sila sa pagpanggawas.

Hinuon ang mga barangay tanod nga nakamatikod sa kaguliyang sa mga tawo sa maong imnanan, maoy misusi dayon niini ug didto gisikop nila   si Hansen ug gisakmit usab ang armas niini.

Matud pa ni SPO2 Pogoy nga gumikan sa kapakyas niini pagpakita og lisensya sa iyang armas ila dayong gibalhug sa prisohan. Gisang-at usab dayon sa kapolisan ang kaso nga kalapasan sa Republic Act 8294 kon illegal nga paghupot ug pagdala og armas nga walay lisensiya. (BANAT NEWS)