BPAT gitukod sa kapolisan

CEBU, Philippines - Aron dunay makatabang sa kapolisan sa probinsya sa pagresponde sa bisan unsang alarma nga motumaw, nagbansay sila karon og mga tawong gustong mamiyembro sa Barangay Peacekeeping Action Team (BPAT).

Ang BPAT maoy magsilbing tugbang sa Barangay Intelligence Network (BIN) dinhi sa dakbayan nga kaabag sa kapolisan pagresponde og alarma.

Ubos sila sa superbisyon sa hepe sa kapolisan sa kalungsoran apan ang nangulo niini mao ang Police Community Relation (PCR) sa Cebu Provincial Police Office (CPPO) nga si Sr. Insp. Allan Cuizon kinsa maoy in-charge sa mga training. Ang mga aplikante kinahanglang lumad nga molupyo sa usa ka barangay nga walay dautang record ug ipailawom sila sa usa ka semanang pagbansay-bansay sa search and rescue operation, disaster incidents, ug intelligence work. Si Sr. Supt. Erson Digal, hepe sa kapolisan sa probinsya nagkanayon nga ang BPAT personnel dako og ikatabang sa kapolisan sa probinsya.

“Mag-monitor sila sa ilang jurisdiction pero kung magpabadlong sila tangtangon gyud,” matud pang Digal.

Sa tibuok probinsya, ang lungsod sa San Remegio may 105 na nga migraduwar   sa training, samtang sa Daanbantayan adunay 75.

Mibahad si Digal sa mga politico nga dili ipagamit ang BPAT isip mga goons sanglit dili man kini ubos sa LGU kundili ubos kini sa provincial command.

Siya midugang nga nagpaabot pa sila sa ubang kalungsoran nga moumol og BPAT aron ipaubos sa training.

Samtang sa pikas bahin mikabat og 16 ka kawani sa Cebu Provincial Police Office (CPPO) ang na-promote sa pagka Superentindent, Sr. Inspector ug Inspector.

Si Milagros Sollano sa Administration, nagranggo na karon og Superentindent.

Samtang pito usab ang na-promote ngadto sa pagka Senior Insp. nga mao sila si Allan Rosario, Kenneth Paul Albotra, Gerald Ace Pelare, Maria Theresa Macatangay, Raymundo Rodriguez, Almirante Bacayo, ug Rovic Villarin.

Walo usab ang na-promote sa pagka Police Insp nga mao sila si Edgar Awe, Ricardo Echavez, Romulo Toralba, Aniceto Manloloyo, Emmanuel Masong, Lamberto Hibaya, Catalina Diotay ug Bernabe Coyoca.

Matud pa ni Digal ang mga bag-ong na-promote adunay dakong responsibilidad sa ilang tagsa-tagsa ka trabaho.

“Great power comes with great responsibility,” matud pa niya.   (BANAT NEWS)