Gullas motabang sa biktima sa baha

CEBU, Philippines - Si Kongresista Eduardo Gullas sa unang distrito sa probinsiya sa Sugbo misaad nga mohatag og hinabang ngadto sa mga naapektohan sa baha sa dakbayan sa Talisay.

Kahinumdoman nga niadtong Huwebes ang ubang parti sa dakbayan sa Talisay gibahaan tungod sa sunod-sunod nga kusog nga bunok sa uwan.

Matud sa Kongresista nga andam siyang mohatag og hinabang sa mga naapektohan sa baha sa Talisay ug gihuwat lang niya ang assessment gikan sa buhatan sa City Social Welfare kung pila ka pamilya ang naapektohan.

Si Felipa Solana, ang hepe sa CSWD nagkanayon nga sukad niadtong milabay’ng adlaw padayon pa sila sa ilang pakisusi sa mga lugar sa mga apiktadong pamilya.

Ang City Engineering Office mitabang usab sa CSWD sa ilang pagsuroy sa mga lugar nga naapektohan.

Ang mga grabeng naapektohan nga mga lugar mao ang sitio Plangganahan sa barangay San Roque, sitio Sombria sa barangay Lawaan I ug Lawaan II, national road sa Bulacao ug Victoria Village sa barangay Tabunok.

Sa laing bahin, ang konseho sa siyudad wala pa modeklara nga ipaubos sa state of calamity ang nahisgutang mga lugar.

Si Solana midugang nga ang kagamhanan sa siyudad makapagawas og pinansiyal nga hinabang kung ang konseho mogama og deklarasyon bahin sa kalamidad. (BANAT NEWS)