Drayber biktima sa carnapping

CEBU, Philippines - Usa ka drayber sa habal-habal nabiktima sa carnapping ug laing duha ka tawo gitulis   sa sa managlahing barangay sa dakbayan sa Talisay sa miaging kaadlawon..

Si Vandolp Anore Causing, 25, taga Spring Ville, barangay Pakigne, lungsod sa Minglanilla maoy mireport ngadto sa Talisay City Police Station human siya unaya og tulis sa duha niya ka pasahero ug wala pa matagbaw gidala pa gyud ang iyang pamasadahang motorsiklo sa nahisgutang mga tulisan niadtong Biyernes sa kaadlawon diha sa barangay Lower Mohon, Talisay.

Base sa imbestigasyon sa kapolisan nga duha ka wala mailhing mga lalaki nga gibana-banang nagpangidaron gikan sa 17 ngadto sa 27-anyos may gitas-on sa barog nga 5’5 nagsul-ob og blue nga mga kalo ug mga yagpison og panglawas misakay ni Causing gikan sa barangay Pakigne, Minglanilla paingon ngadto sa dakbayan sa Talisay.

Matud sa biktima nga sa dihang miabot na sila sa lugar nga nahitaboan kalit lang siyang gitionan og pusil sa maong mga pasahero ug gikuha ang iyang pitaka nga adunay sulod nga P200 ug ang iyang driver’s license.

Wala pa matagbaw ang duha gipakanaog si Causing sa iyang XRM nga motorsiklo kolor puwa, ug gisakiyo kini sa mga tulisan.

Sa laing bahin, sa mao gihapon adlaw duha ka mga batan-on ang gitulis samtang nag-estambay atubangan sa usa ka tindahan sa Ramona Village, sa barangay San Isidro, Talisay.

Ang mga biktima mao sila si Jayben Fernandez, 22, ug Rio Rizaldy, 19, pulos mga residente sa nahisgutang dapit.

Nadala sa duha ka wala mailhing tulisan ang Nokia 6000 nga cellphonesa biktima nga nagkantidad og P5 mil ug gold nga kwentas nga nagkantidad og P6 mil gikan kang Fernandez.

Samtang si Rizaldy nasakmitan usab sa mga tulisan sa iyang usa ka Nokia cellphone 100 nga nagkantidad og P1,000.

Base sa imbestigasyon sa mga polis nga ang duha nag-estambay sa atubangan sa usa ka tindahan ug nakig-istorya sa uban nilang mga higala dihang kalit lang mitungha ang duha ka wala hiilhing nga lalaki nga nagsakay og motorsiklo.

Ang angkas niini maoy mikanaog ug miduol ngadto sa nahisgutang mga batan-on dayong ti-on og pusil ug gipanguha ang nahisgutang mga butang.

Human og pagpanulis ang nahisgutang mga tulisan dali usab kining mibiya diha sa lugar. (BANAT NEWS)