TCIB tukoron pag-usab sa kapolisan

CEBU, Philippines - Ang Talisay City Police Station naglaraw nga organisahon pag-usab ang mga sakop sa Talisay City Intelligence Bureau (TCIB) o kanhi Barangay Intelligence Network (BIN).

Si Inspector Hugo Rio Ipong nga nahinabi sa Banat News kagahapon nagkanayon nga base sa ilang record mokapin sa 100 ka TCIB ang anaa sa listahan apan kasagaran kanila dili na aktibo.

Gibutyag ni Ipong nga sa pagkakaron mopakin nalang sa 20 ka mga sakop sa TCIB ang aktibo nga maoy dali kaayong motabang panahon sa ilang operasyon sama sa pagpahigayon og check point sa kadalanan sa Talisay.

 Ang uban nga mga TCIB nagpasakop lang aron makabaton og ID ug t-shirt ug giingong dad-on ang ngalan sa grupo alang sa personal nilang tumong.

Gumikan niini ang hepe sa Talisay City Police Station nga si Superintendent Henry Biñas nagplanong i-reorganize o pundokon pag-usab ang TCIB sa siyudad ug higpitan na nila sa paghashas ang gustong magpamiyembro niini aron sa paglikay nga adunay abusado nga mogamit sa ngalan sa grupo alang sa personal nilang intensiyon.

Hinuon matud ni Ipong nga ang pagpasakop sa TCIB boluntaryo kini ug ang gustong magpasakop sultihan na nilang daan nga wala silay madawat nga mga benipisyo ug honorarium hinungdan nga dili usab makapugos ang kapolisan kung dili kini motabang  kanila sa ilang mga operasyon diha sa dakbayan.

Matud pa usab ni Ipong nga ang TCIB dakung abag ngadto sa mga polis isip nga multiplier force.

 Ang mga bag-ong ma-recruit nga TCIB ipaubos usab sila sa seminar ug pagbansay-bansay sama sa information gathering o pagtigom og mga impormasyon, crowd control ug pag-approach ngadto sa publiko panahong motabang sila sa operasyon sa check point sa kapolisan.    (BANAT NEWS)